Sud nie zadavoliŭ kasacyjnuju skarhu źbitaha milicyjaj žurnalista Tut.by Paŭła Dabravolskaha

U Minskim haradskim sudzie razhledieli kasacyjnuju skarhu žurnalista Tut.by Paŭła Dabravolskaha, jakoha miesiac tamu, 25 studzienia, zatrymali ŭ budynku suda Frunzienskaha rajona padčas pracesu nad hraficistami, źbili, a potym jašče i aštrafavali za nibyta niepadparadkavańnie milicyi i drobnaje chulihanstva.

«Užo prajšoŭ adviedzieny na raźbiralnictva miesiac z momantu majho zvarotu ŭ Śledčy kamitet z prośbaj pryciahnuć milicyjantaŭ da adkaznaści za źbićcio. Ale adkazu ad śledčych pa-raniejšamu niama: jany nie telefanujuć sami i nie adkazvajuć na maje telefanavańni. U SK pa-raniejšamu znachodziacca maje rečy, parvanyja milicyjantami, i mabilny telefon, na jaki ja sprabavaŭ źniać padziei 25 studzienia. Telefon mnie abiacali addać praź dzień-druhi, ale zaraz jany navat na suviaź sa mnoj nie vychodziać», – raspavioŭ pres-słužbie BAŽ Pavieł Dabravolski.

Pakul nie atrymała adkazu na svoj zvarot u SK i HA «Biełaruskaja asacyjacyja žurnalistaŭ», jakaja źviarnułasia tudy na nastupny dzień paśla incydentu z patrabavańniem pryciahnuć milicyjantaŭ da kryminalnaj adkaznaści.

«U svajoj kasacyjnaj skarzie ja prašu admianić štraf u dačynieńni da mianie na toj padstavie, što sud pieršaj instancyi admoviŭsia vysłuchać śviedak z majho boku. Akramia taho, u sudovaj pastanovie šmat niestykovak – niekatoryja skazy prosta supiarečać inšym. Ale ja, kali ščyra, hatovy da luboha rašeńnia. Sud moža jak admianić papiaredniaje rašeńnie, tak i pakinuć jaho ŭ sile», — zajaviŭ učora Dabravolski.

Razhlad spravy prajšoŭ vielmi chutka. Užo praz 10 chvilin sudździa abjaviŭ pierapynak na vyniasieńnie rašeńnia.

U vyniku skarhu Dabravolskaha sud nie zadavoliŭ i pakinuŭ bieź źmienaŭ. 

Žurnalist skazaŭ «NN», što niečakanaściu dla jaho heta nie stała. Paśla pravierki Śledčaha kamiteta jon maje namier abskardzić rašeńnie praz staršyniu haradskoha suda ci prakuraturu. Abskardžańnie rašeńnia abydziecca ŭ 1 bazavuju vieličyniu. 

***

Nahadajem, što 25 studzienia padčas sudovaha pasiadžeńnia hramadskija aktyvisty Pavieł Siarhiej i Maksim Šycik razharnuli raściažku «Nie — palityčnamu pieraśledu». Kali maładych ludziej siłkom vyvodzili z zały, Dabravolski pačaŭ zdymać incydent na kamieru. Jaho zatrymali i źbili razam z aktyvistami.

Sudździa Kamisaraŭ zabaraniŭ siońnia jaho zdymać. Prymusiŭ žurnalistaŭ vydalić kadry i pravieryŭ kamieru na adsutnaść fota.

Valeryj Kamisaraŭ u svoj čas razhladaŭ kasacyjnyja skarhi Źmitra Daškieviča, Eduarda Łobava, Alaksandra Atroščankava, Dźmitryja Novika i Alaksandra Małčanava. Byŭ u śpisie nievyjaznych čynoŭnikaŭ.

Pavialičyć

• 0
• 0
• 0
• 0
• 0
• 0
• 0
• 0