Staršynioj BSDP (Hramada) pieraabranaja Iryna Vieštard — ź minimalnaj pieravahaj FOTA

Staršynioj Biełaruskaj sacyjał-demakratyčnaj partyi (Hramada) pieraabranaja Iryna Vieštard. Adpaviednaje rašeńnie było pryniata delehatami XVI čarhovaha źjezda arhanizacyi, jaki prajšoŭ 13 sakavika ŭ Minsku.

Pavialičyć

Usiaho ŭ tajnym hałasavańni brali ŭdzieł 82 delehaty, pieramožcam ličycca toj, chto nabiare 50% plus adzin hołas.

Vieštard pieramahła ź minimalnaj pieravahaj: jaje padtrymali 42 delehaty, admovili ŭ padtrymcy — 40.

Ihara Masłoŭskaha padtrymali 38 delehataŭ, Viktara Kryvala — 0.

Asnoŭny kanflikt na źjeździe razhareŭsia pamiž prychilnikami Vieštard i Masłoŭskaha.

Na dumku prychilnikaŭ dziejnaha staršyni partyi, kali kiraŭnikom partyi budzie abrany Masłoŭski, heta moža pryvieści da pierachodu partyi pad kantrol kampanii «Havary praŭdu». Masłoŭski źjaŭlajecca aktyvistam hetaj kampanii, jon aktyŭna padtrymlivaŭ Taćcianu Karatkievič padčas prezidenckich vybaraŭ 2015 hoda.

Pradstaŭlajučy svaju kandydaturu delehatam źjezda, Vieštard adznačyła, što ličyć siabie «adkaznym čałaviekam», jana imknułasia zrabić usio «mahčymaje i niemahčymaje», a tamu hatovaja pracavać dalej.

Masłoŭski, u svaju čarhu, zajaviŭ, što partyi «patrebny pieramieny», jana «pavinna supraćstajać vyklikam sučasnaści». Pavodle jaho, nieabchodna pavyšać paznavalnaść i rejtynh partyi. «Jana nie pavinna być radykalnaj, ale pavinna być efiektyŭnaj, nie tolki krytykavać uładu, ale i prapanoŭvać svaje rašeńni prablem u hramadstvie», — skazaŭ Masłoŭski.

Pavialičyć

Iryna Vieštard naradziłasia ŭ 1953 hodzie. Skončyła Biełaruski dziaržaŭny univiersitet. Pracavała nastaŭnicaj Kamienskaj siaredniaj škoły Łahojskaha rajona i SŠ №3 Smarhoni, była inśpiektaram škoł Smarhoni. U BSDP ŭstupiła ŭ 1991 hodzie. Z 2009 hoda staršynia Hrodzienskaj abłasnoj partyjnaj arhanizacyi, z kastryčnika 2010-ha — namieśnik staršyni, z červienia 2011-ha — staršynia partyi.

Varta adznačyć, što Biełaruskaja sacyjał-demakratyčnaja partyja (Hramada) — adna z troch palityčnych struktur z padobnaj nazvaj.

Akramia jaje isnuje Biełaruskaja sacyjał-demakratyčnaja Hramada pad kiraŭnictvam eks-śpikiera Viarchoŭnaha Savietu Biełarusi Stanisłava Šuškieviča, a taksama dziejničaje arhanizacyjny kamitet pa stvareńni Biełaruskaj sacyjał-demakratyčnaj partyi (Narodnaja Hramada), kiraŭnikom jakoha źjaŭlajecca kandydat u prezidenty Biełarusi na vybarach 2010 hoda, były palitviazień Mikałaj Statkievič.

• 0
• 0
• 0
• 0
• 0
• 0
• 0
• 0