Piščałaŭski zamak adnoviać nie raniej za 2020 hod, Paŭnočny zavułak — paśla budaŭnictva mietro
U administracyi Maskoŭskaha rajona praanalizavali pracu pa achovie historyka-kulturnaj spadčyny i raspaviali pra los niekalkich značnych dla horada abjektaŭ, paviedamlaje ahienctva «Minsk-Naviny». Što ž čakaje Piščałaŭski zamak na Vaładarskaha i Paŭnočny zavułak, kala jakoha ciapier budujecca mietro?
Piščałaŭski zamak byŭ uźviedzieny ŭ 1825 hodzie. U ciapierašni čas jon naležyć Departamientu vykanańnia pakarańniaŭ MUS Biełarusi i ŭ im raźmieščany śledčy izalatar № 1, bolš viadomy ŭ narodzie jak «Vaładarka».
Paśla abvału adnoj ź viežaŭ u 2008-m zamak byŭ zakansiervavany. Jak paviedamiŭ namieśnik načalnika izalatara Alaksandr Karnijenka, kab paźbiehnuć dalejšaha razbureńnia, usie kanstrukcyi budynka ŭmacavanyja ściažkami, vystaŭlenyja tak zvanyja majaki, pamiaškańni całkam vyzvalenyja ad prysutnaści ŭ ich ludziej. U 2014 hodzie raspracavali techničnaje zaklučeńnie, u adpaviednaści ź jakim nieabchodna było pravieści šerah mierapryjemstvaŭ dla adnaŭleńnia ŭsich funkcyj zbudavańnia. Dla hetaha patrabujecca kala 83 młrd rubloŭ (kala 4,1 miljona dalaraŭ pa aktualnym kursie). Adnak adnaŭlenčyja raboty niemahčymyja da vyznačanaha na 2020 hod poŭnaha pieranosu SIZA ŭ novy budynak u Kaladzičach.
Paŭnočny zavułak raźmieščany ŭ rajonie pierasiačeńnia vulic Kłary Cetkin i Niamihi, dzie ciapier budujecca stancyja mietro «Płošča Bahuševiča».
Paśla zaviaršeńnia budaŭnictva tut treba budzie vykanać dobraŭparadkavańnie terytoryi, adnavić piešachodnyja i transpartnyja suviazi, vuličnaje aśviatleńnie. Razhladajucca varyjanty pierasialeńnia žycharoŭ damoŭ, jakija ujaŭlajuć historyka-kulturnuju kaštoŭnaść, u sučasnaje žyllo i pieratvareńnia zavułka ŭ paŭnavartasny turystyčny abjekt.
Kamientary