U siecivie źjaviłasia staronka etnahrafičnaha fonaarchivu Uładzimiera Žuroviča z zapisami narodnych śpievaŭ, jakija byli zroblenyja 40 i bolš hod tamu.
Fonaarchiŭ Uładzimiera Žuroviča – heta masiŭ zapisaŭ narodnych piesień, zroblenych samim falklarystam abo ź jaho prośby ŭ jaho rodnym Lelčyckim rajonie, a taksama ŭ inšych miaścinach Homielščyny. Zapisy rabilisia, jak miarkujecca, u 1970-ja, da našaha času «dažyli» daloka nia ŭsie i nia ŭ samaj lepšaj jakaści. Dziejnaść Uładzimiera Žuroviča absalutna niedaśledavanaja, a jaho imia praktyčna nieviadomaje. Miž tym, jaho aŭtarskuju muzyku vykarystoŭvali i ŭ Dziaržaŭnym narodnym chory BSSR, i ŭ ansambli «Pieśniary». Dziakujučy hetamu falklarystu i kampazytaru źjaviŭsia telefilm «Pieśni Paleśsia».
Muzykaznaŭca i narodny artyst Biełarusi Hienadź Citovič charaktaryzavaŭ Uładzimiera Žuroviča jak «biełaruskaha melamana», što vyras u atmasfery paleskich śpievaŭ, a pastaleŭšy, słuchaŭ, zapisvaŭ i rasšyfroŭvaŭ vializnuju kolkaść aŭtentyčnych piesień.
Na staroncy fonaarchivu Žuroviča na Soundcloud raźmieščanyja na prasłuchoŭvańnie i spampoŭvańnie niekalki dziasiatkaŭ vybranych zapisaŭ archivu – najbolš jakasnych pavodle źmiestu i pavodle huku. Śpis aŭdyjotrekaŭ budzie papaŭniacca. Stvoranaja taksama google-mapa, jakaja adlustroŭvaje miescy, dzie rabilisia hetyja zapisy, a taksama padrabiazny vopis usiaho fonaarchivu.
Zapisy z fonaarchivu mohuć być karysnymi jak dla amataraŭ biełaruskaha falkloru, tak i dla etnohrafaŭ-muzykaznaŭcaŭ i dla kampazytaraŭ, što žadajuć uklučyć u svaje tvory rysy etničnaj muzyki Paleśsia. Apracoŭku fonaarchivu Žuroviča viadzie redakcyja etnahrafičnaj supołki «Volny archiŭ»
Babaryka pra siabie ŭ 2020-m: Heta nie naiŭnaść. Nie dumaju, što takoha kryvažernaha scenara niechta čakaŭ79
Kamientary