Misija Mižnarodnaha valutnaha fondu na čale ź Piteram Dołmanam budzie pracavać u Biełarusi z 19 vieraśnia pa 1 kastryčnika, paviedamili ŭ minskim pradstaŭnictvie fondu.»Mety misii buduć aficyjna pradstaŭlenyja jaje kiraŭnikom Piteram Dołmanam u pačatku nastupnaha tydnia», — adznačyli ŭ pradstaŭnictvie.
Papiaredniaja misija MVF pracavała ŭ krainie z 21 pa 30 červienia. Jaje metaj była acenka biahučaj ekanamičnaj palityki pa artykule IV statuta fondu.
Pa vynikach misii Dołman paviedamiŭ žurnalistam, što fond pazityŭna aceńvaje reformy ŭ biełaruskaj ekanomicy, ale ličyć nieabchodnym ich pahłybić i paskoryć. Akramia taho, MVF raźličvaje na publikacyju vynikaŭ niezaležnaj dyjahnostyki biełaruskich bankaŭ i rekamienduje pravieści ŭ krainie šyrokuju dyjahnostyku siektara dziaržpradpryjemstvaŭ.
«My padzialajem metu ŭrada pa stopracentnaj kampiensacyi zatrat na pasłuhi ŽKH nasielnictvam da 2018 hoda», — zajaviŭ taksama Dołman. Kiraŭnik misii abviaściŭ prahnoz MVF pra pierśpiektyvy biełaruskaj ekanomiki: «My čakajem, što recesija ŭ Biełarusi ŭ 2016—2017 hadach budzie zachoŭvacca». Zhodna z acenkaj fondu, VUP krainy ŭ 2016 hodzie źnizicca na 3%, u 2017-m — na 0,5%.
U svaju čarhu staršynia praŭleńnia Nacyjanalnaha banka Pavieł Kałaur 4 lipienia zajaviŭ, što bačańnie strukturnych aśpiektaŭ pavyšeńnia efiektyŭnaści nacyjanalnaj ekanomiki «ŭ cełym supadaje z pazicyjaj Mižnarodnaha valutnaha fondu, vyjaŭlenaj u časie apošniaj (červieńskaj) misii».
Biełaruskija ŭłady raźličvajuć na novuju prahramu supracoŭnictva z fondam, zapytvajučy ŭ MVF kredyt na 3 młrd dalaraŭ pad 2,28% hadavych terminam na 10 hadoŭ. Pra heta, u pryvatnaści, zajaŭlaŭ premjer-ministr Andrej Kabiakoŭ 1 śniežnia 2015 hoda na naradzie ŭ Alaksandra Łukašenki.
Kabiakoŭ tady adznačyŭ, što krainie «nieabchodna pryciahnuć jak maha na bolš kamfortnych umovach pa terminach i košcie resursy MVF». Łukašenka ŭ adkaz zajaviŭ, što heta «dobry kredyt, z dobrym abjomam resursaŭ i dobrym pracentam». «Nichto nam, u tym liku i rasijanie, pad takija pracenty kredytaŭ nie daje. Nam heta vyhadna», — skazaŭ jon.
U 2009—2010 hadach Biełaruś atrymała ad MVF u ramkach prahramy stand-by piać tranšaŭ kredytu na ahulnuju sumu 3,46 młrd dalaaraŭ.
Kamientary