«Nie ŭtrymlivaje elemientaŭ parnahrafii». Respublikanskaja kamisija pra numar «BiełHaziety» z fota byka
Respublikanskaja ekśpiertnaja kamisija pa praduchileńni prapahandy parnahrafii, hvałtu i žorstkaści nie znajšła ničoha kramolnaha ŭ fota, z-za jakoha nakład «BiełHaziety» byŭ kanfiskavany z kijoskaŭ. Pra heta paviedamiŭ žurnalist vydańnia Dźmitryj Rastajeŭ, piša Tut.by.
Jak vynikaje z aficyjnaha adkazu, «vyvučyŭšy pakazany fotamateryjał, kamisija pryjšła da vysnovy, što jon nie ŭtrymlivaje elemientaŭ erotyki, parnahrafii, zaafilii, hvałtu i žorstkaści».
«Pa žanry heta infarmacyjny fotazdymak, na jakim zafiksavanaja praca śpiecyjalista pa vieterynaryi i zaatechnicy. Miarkujem, što jon pryznačany dla raspaŭsiudžvańnia ŭ śpiecyjalizavanych vydańniach pa dadzienym profili», — havorycca ŭ aficyjnym liście, padpisanym staršynioj REK i jaho namieśnikam.
Numar «BiełHaziety» byŭ źniaty z prodažu ŭ staličnych kijoskach 30 maja. Pryčynaj stała «kramolnaje fota» na pieršaj pałasie, jakoje ilustravała artykuł, pryśviečany apošnim zajavam kiraŭnika Raśsielhasnahladu Siarhieja Dankvierta ab najaŭnaści antybijotykaŭ dla lačeńnia vienieryčnych zachvorvańniaŭ u biełaruskim małace.
Jak paviedamlaje Rastajeŭ, hety zdymak «BiełHazieta» zapazyčyła ŭ ahienctva Reuters.
«Zrešty, addamo naležnaje i «Sajuzdruku» — źniaŭšy numar z prodažu ŭ Minsku i Minskaj vobłaści, kiraŭnictva pradpryjemstva prapanavała rehijonam samim vyrašać, puskać jaho ŭ kijoski ci nie. U vyniku samymi prasunutymi akazalisia Hrodna, Homiel i Mahiloŭ — tam «skandalny» 20-y numar raspaŭsiudžvaŭsia na minułym tydni razam z «šarahovym» 21-m», — paviedamlaje žurnalist.
Kamientary