Chłopiec na chviliny spaźniŭsia na skačok z truby, dzie raźbiŭsia inšy džampier
20-hadovy minčuk M. (paprasiŭ nie nazyvać jaho imia) naradziŭsia ŭ kašuli. Chłopiec źbiraŭsia skoknuć na viaroŭcy z 70-mietrovaj truby kacielni ŭ Sosnach u toj samy dzień, kali tam raźbiŭsia inšy roŭpdžampier. Ale paprostu spaźniŭsia da vyznačanaha času.
«Ranicaj 18 červienia hulaŭ u futboł, paśla hetaha pryjšoŭ dadomu krychu stomleny. I vyrašyŭ, što možna adpačyć i pryjechać hadzinak da čatyroch, — raspaviadaje Jeŭraradyjo M. — Ale niejak niedakładna raźličyŭ čas na darohu. Ci prosta nie vielmi śpiašaŭsia».
Tym časam z truby niaŭdała skoknuŭ 27-hadovy chłopiec. Viadoma, što siertyfikat na skačok jamu na dzień narodzinaŭ padaryli siabry. Heta byŭ jaho pieršy skačok.
M. taksama atrymaŭ siertyfikat na dzień narodzinaŭ. Ale, na ščaście, jon pryjechaŭ da truby na hadzinu paźniej, čym źbiraŭsia. «Maja niepunktualnaść vyratavała mnie žyćcio, — dadaje chłopiec. — Ja pryjechaŭ [u Sosny] i patelefanavaŭ udakładnić, dzie kankretna mnie treba być. Ale mnie skazali, što na siońnia ŭsio skončyłasia. Hołas u chłopca byŭ nervovy. Zaraz ja ŭžo razumieju, čamu».
Svoj siertyfikat M. ličyć ščaślivym. Chłopiec dumaje zachavać jaho na ŭspamin pra hetuju historyju. A voś skakać na viaroŭcy ŭ bližejšy čas čamuści nie źbirajecca:
«Zrazumieła, što ŭ bližejšy čas dakładna nie. Ja ŭpeŭnieny, što zaraz i arhanizoŭvać nichto hetaha nie budzie, bo… Nu, vy sami ŭsio razumiejecie».
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj32
Kamientary