U Minsku źjavicca pomnik Kalinoŭskamu? «Kožny pomnik u krainie ŭzhadniaje asabista prezident»
U novym płanie zabudovy vulicy Kalinoŭskaha praduhledžanaja miemaryjalnaja zona z pomnikam hieroju Paŭstańnia 1863 hoda.
Prajekt zabudovy, raspracavany «Minskhrada», vyniesieny na hramadskaje abmierkavańnie, paviedamlaje Onliner.by.
U kamitecie architektury i horadabudavańnia Minharvykankama paviedamili, što kali prajekt vyniesieny na hramadskaje abmierkavańnie, to, značyć, jon užo byŭ uzhodnieny.
Adnak pomnik moža i nie źjavicca.
«Detalny płan zabudovy — heta, skažam tak, dakumient pra stratehiju raźvićcia, kirunak raźvićcia terytoryi. I ŭ takich dakumientach pomniki nie paznačajuć, — patłumačyła «Našaj Nivie» Iryna Vabiščevič, načalnik adździeła histaryčnaj zabudovy i dobraŭparadkavańnia kamiteta architektury. — Uzhadnieńnie i ŭstalavańnie pomnika prachodzić zusim pa-inšamu, jano nie maje dačynieńnia da detalnaha płana zabudovy, jano moža prachodzić paźniej ci navat paralelna i niezaležna ad jaho».
Jašče adzin cikavy momant: pa słovach Vabiščevič, kožny pomnik, jaki staviać u honar niejkaj asoby, spačatku pavinien atrymać «dabro» ad prezidenta. Tolki kali Łukašenka nie vykažacca suprać, tady pačynajecca praca.
Što ž tyčycca niejkaj pracy pa ŭstalavańni pomnika Kalinoŭskamu, to va ŭpraŭleńni pa ideałahičnaj pracy ŭpraŭleńnia kultury Minharvykankama paviedamili, što ničoha nie čuli pra heta.
U «Minskhrada» padrabiaznaści źjaŭleńnia pomnika ŭ svaim prajekcie pakul nie kamientujuć.
Nahadajem, što kampanija pa zbory podpisaŭ prachodziła jašče ŭ 2013 hodzie. Tady za nieabchodnaść ustanoŭki pomnika Kalinoŭskamu vykazalisia amal 4 tysiačy čałaviek. Ale Minharvykankam adkazaŭ, što na adzin z damoŭ pa vulicy Kalinoŭskaha viarnuli miemaryjalnuju došku, tamu ŭstaloŭvać pomnik užo «niemetazhodna».
Kamientary