Aŭstralijskaja palicyja zajaviła ab zatrymańni padazravanaha ŭ padrychtoŭcy teraktu, jaki sprabavaŭ dastavić vybuchovaje prystasavańnie na bort samalota, padkłaŭšy jaho ŭ bahaž ŭłasnaha brata, paviedamlaje VVS.
Padazravany byŭ aryštavany ŭ minułuju subotu, 29 lipienia, padčas palicejskich rejdaŭ ŭ Sidnei. Palicyja ciapier rasśleduje dźvie spravy ab padrychtoŭcy teraktaŭ, arhanizatary jakich dziejničali, jak miarkujuć, pry padtrymcy terarystyčnaj hrupoŭki «Isłamskaja dziaržava».
Padazravanyja pa druhoj spravie płanavali vyrabić i prymianić pryładu, jakaja b raspyliła taksičny haz u niejkim ludnym miescy.
Pavodle zajavy palicyi, hetyja płany byli całkam spynienyja.
Pradstaŭnik fiederalnaj palicyi Aŭstralii Majkł Fełan zajaviŭ, što heta byŭ adna z samych chitramudrych złačynnych zadum, kali-niebudź zapłanavanych na aŭstralijskaj ziamli.
U bahažy była znojdzienaja vysokatechnałahičnaja vybuchovaja pryłada vajennaha ŭzoru, vyśvietlenyja dvoje padazravanych, udakładniŭ jon.
Zhodna z płanam, brat adnaho z padazravanych, jaki, jak miarkuje palicyja, nie viedaŭ pra vybuchoŭku, pavinien byŭ pranieści jaje ŭ bahažy na bort samalota kampanii Etihad Airways, jaki pakidaŭ aeraport Sidneja 15 lipienia.
Adnak pa nieviadomaj pryčynie ŭ apošniuju chvilinu realizacyja złačynnaha płana była spynienaja, i, choć zaminavany bahaž i byŭ pryviezieny ŭ aeraport, zarehistravany jon nie byŭ. U vyniku brat padazravanaha padniaŭsia na bort samalota — kirunak vyletu jakoha nie ŭdakładniajecca, — i palacieŭ biez bahažu.
«U nas jość siakija-takija zdahadki nakont taho, čamu čamadan nie dabraŭsia da stojki rehistracyi bahažu, ale ja chaču skazać całkam dakładna: hety bahaž i blizka nie padychodziŭ da kantrolu biaśpieki», — skazaŭ Majkł Fełan.
Pavodle danych palicyi, padazravanyja sabrali bombu z detalaŭ, jakija prybyli ŭ adnym pakiecie hruzavym avijarejsam z Turcyi pry sadziejničańni vysokapastaŭlenaha dziejača ID.
Adzin z padazravanych byŭ u kantakcie z hetym džychadzistam pačynajučy z krasavika.
Pa słovach palicyjantaŭ, kali płan z bombaj na borcie samalota pravaliŭsia, padazravanyja prystupili da realizacyi druhoha płana pa raspyleńni sieravadarodu ŭ hramadskim miescy.
Ale ŭ minułuju subotu palicyja spyniła dziejnaść padazravanych i kanfiskavała chimikaty i kampanienty pryłady.
Dzie mienavita padazravanyja mieli namier učynić hazavuju ataku, u palicyi nie ŭdakładniajuć.
Kamientary