Bresckija śledčyja raskryli spravu ab zabojstvie žančyny, čyjo razrublenaje cieła było znojdziena 14 hadoŭ tamu ŭ Bresckim rajonie, paviedamiŭ na pres-kanfierencyi 11 vieraśnia načalnik upraŭleńnia Śledčaha kamiteta pa Bresckaj vobłaści Alaksandr Rachmanaŭ, paviedamlaje tut.by.
Padčas vyšukovych mierapryjemstvaŭ i śledčych dziejańniaŭ było vyjaŭlena, što paciarpiełaj źjaŭlajecca 37-hadovaja žycharka Rasijskaj Fiederacyi, jakaja pražyvała ŭ Maskvie. Pa dadzienych śledstva, žančyna viała asacyjalny ład žyćcia.
Bresckija śledčyja zapatrabavali z Rasii nieabchodnyja dakumienty, vyvučyŭšy jakija vyłučyli viersiju pra toje, što jana stała achviaraj «čornych ryełtaraŭ» z Kurska, adnamu ź jakich ciapier 35 hadoŭ, druhomu — 39.
«Pad markaj abmienu žylla jany zavałodali kvateraj i potym zaprasili jaje ŭ Brest adpačyć. Tut jany ździejśnili zabojstva, a trup razrubili. Paśla čaho jany viarnulisia ŭ Rasijskuju Fiederacyju», — paviedamiŭ Alaksandr Rachmanaŭ.
Jak udakładniŭ načalnik abłasnoha ŭpraŭleńnia, złačynstva ŭdałosia raskryć dziakujučy sadziejničańniu kalehaŭ z Rasiei. Dadzienaje zabojstva akazałasia nie adzinym u ich śpisie. Ciapier abodva padazravanyja znachodziacca ŭ turmach. U 2014 hodzie ich pryznali vinavatymi ŭ zabojstvie, jakoje jany ździejśnili ŭ 2005 hodzie. Tady złačynnaja hrupa takim ža čynam adabrała kvateru ŭ invalida, zabiła jaho i vyviezła ŭ Arłoŭskuju vobłaść. Abvinavačanym pryznačyli ad 12 da 18 hadoŭ pazbaŭleńnia voli, paviedamlała RIA «Novosti».
Kamientary