Prezident Małdovy Ihar Dadon zajaviŭ, što abjadnańnie z Prydniastroŭjem stanie mahčymym u vypadku parazy na parłamienckich vybarach prazachodnich libierałaŭ. Ab hetym jon skazaŭ u intervju RIAN.
«Jak možna vyrašyć prydniastroŭskaje pytańnie? Pieršaje, i heta pavinna być asnovaj, — heta pramałdaŭskaja bolšaść u parłamiencie, jakaja nie imkniecca ŭ NATA, nie vystupaje za abjadnańnie Małdovy z Rumynijaj. Takaja ŭłada moža źjavicca ŭ kancy 2018 hoda — paśla parłamienckich vybaraŭ», — zajaviŭ Dadon.
Druhim umovaj abjadnańnia jon nazvaŭ damoŭlenaści z Tyraspalem ab stvareńni ahulnaj krainy. «Heta vielmi niaprosta. Roznyja pakaleńni, roznyja sistemy dziaržaŭnaha kiravańnia, roznyja padatkovyja sistemy. Heta nie hod i nie dva», — adznačyŭ kiraŭnik dziaržavy.
Treciaj umovaj jon nazvaŭ «hieapalityčnaje akienca» ŭ adnosinach Rasii i Zachadu. Pa jaho słovach, pa aptymistyčnym scenary abjadnańnie moža adbycca ŭ 2019-2020 hadach. «Było b idealna pravieści prezidenckija vybary 2020 hoda ŭ abjadnanaj dziaržavie», — skazaŭ na zakančeńnie jon.
U Ciraspali nie raz padkreślivali, što nie źbirajucca abmiarkoŭvać pytańnie pra ŭźjadnańnie z Kišyniovam. U studzieni prezident niepryznanaj Prydniastroŭskaj Małdaŭskaj Respubliki (PMR) Vadzim Krasnasielski adchiliŭ prapanovu Dadona ab praviadzieńni na abodvuch bierahach Dniastra refierendumu ab adnaŭleńni adzinaj krainy. «U nas u Prydniastroŭi ŭ 2006 hodzie narod vykazaŭsia za niezaležnaść Prydniastroŭja z nastupnym uvachodžańniem jaho ŭ skład Rasii. Naš narod vyznačyŭsia», — ukazaŭ jon.
Kanflikt pamiž Kišyniovam i PMR, jakaja paśla abviaściła niezaležnaść ad Małdovy, pačaŭsia ŭ 1989 hodzie. Uzbrojenaje supraćstajańnie było spynienaje ŭ 1992-m.
Kamientary