14 listapada palicyjaj horada Hdynia zatrymany 30-hadovy hramadzianin Biełarusi Ściapan Śvidzierski. Niekatoryja polskija ŚMI paviedamlajuć, što mužčyna zładziŭ stralbu ŭ ofisie Thomson Reuters, dzie pracavaŭ apošnim časam. Nichto nie paciarpieŭ.
Sprava ŭ tym, što Ściapan aktyŭna zajmaŭsia stralboj, udzielničaŭ u spabornictvach. U jaho jość dazvoł na našeńnie zbroi. U jaho arsienale było čatyry adzinki zbroi: vintoŭka Suhl KK150, pistalety Glock 17 Gen, Standard A.R.C. IWB Holster i FWB AW93. Źbiraŭsia nabyć jašče adzin pistalet.
Amal uvieś svoj volny čas jon pravodziŭ na treniroŭkach, tamu navat na pracu chadziŭ u druhuju źmienu. U hdyńskim ofisie mižnarodnaj kampanii Thomson Reuters Ściapan zajmaŭsia ŭviadzieńniem u bazu dadzienych firmaŭ. Na pracu ŭładkavaŭsia ŭžo dastatkova daŭno — hadoŭ 5—6 tamu.
Ściapan Śvidzierski — rodam z Horadni, byŭ aktyvistam «Moładzi BNF». Vučyŭsia na histaryčnym fakultecie BDU, ale byŭ adličany za pratesty viasny 2006 hoda. Pajechaŭ pa pieršym nabory na prahramu Kalinoŭskaha. Advučyŭsia na historyka ŭ Hdańsku i tam zastaŭsia.
Ci sapraŭdy Ściapan učyniŭ stralbu? Siabry chłopca kažuć, što situacyja była kryšku inšaj, čym padajuć u ŚMI. Adzin z supracoŭnikaŭ kampanii ŭbačyŭ, što Ściapan pry sabie maje zbroju: vintoŭku i pistalet. U hety samy momant jon i nakinuŭsia na Śvidzierskaha, kab taho abiazzbroić.
Chłopcy pačali pichacca-šturchacca, zaviazałasia baraćba. Mienavita ŭ hety momant i prahučali streły. Mienavita ŭ takoj paśladoŭnaści: spačatku vałtuźnia, a potym streły, a nie naadvarot.
U Biełarusi ŭ Ściapana žyvie mama. Jak kažuć znajomyja chłopca, jon štodnia ź joj śpisvajecca i stelefanoŭvajecca, časta pryjazdžaje ŭ Biełaruś.
«Jon žyŭ tolki pracaj, stralboj i Ukrainaj», — kažuć siabry Ściapana. Jon byŭ vałancioram, dapamahaŭ ukrainskim dobraachvotnikam na ŭschodzie Ukrainy. Sam nieadnarazova jeździŭ va Ukrainu, kab niepasredna na miescy akazvać dapamohu.
Ciapier Ściapan Śvidzierski aryštavany. Siabry zmahli znajści dla jaho advakata, jaki ŭžo siońnia sustreniecca z zatrymanym. Mahčyma, paśla hetaha budzie viadoma bolš padrabiaznaściaŭ incydentu.
***
Na telehram-kanał «Našaj Nivy» možna padpisacca tut.
Ciapier čytajuć
Babaryka pra siabie ŭ 2020-m: Heta nie naiŭnaść. Nie dumaju, što takoha kryvažernaha scenara niechta čakaŭ46
Kamientary