Načnyja dziažurstvy pad ofisam Upraŭleńnia kapitalnaha budaŭnictva Centralnaha rajona Minska ŭžo stali tradycyjaj. U siaredzinie studzienia pad dźviaryma ŭstanovy praciahvajuć načavać budučyja ŭładary kvater u Navinkach.
Ranicaj 10 studzienia pačniecca prodaž novaj partyi kvater u domie ŭ Navinkach. Košty padraśli (ciapier $820 zamiest $650—700, jak było raniej), adnak pakupnikoŭ mienš nie stała. Ludzi znoŭ stajać u čarzie na marozie, kab płacić za žyllo mienš za rynkavuju canu — jana składaje kala 1000—1200 dalaraŭ.
«Ja budu nabyvać adnapakajoŭku. Ekanomlu kala $5—7 tysiač», — padličvaje adzin z surazmoŭcaŭ.
Na hety raz pakupnikam prapanujuć 69 kvater: 45 adnapakajovak i 24 dvuchpakajovyja. Chto što atrymaje, dakładna nieviadoma. Ludzi pryznajucca, što nie ŭsie ŭ čarzie kažuć, kolki kvater buduć brać, tamu nie ŭsim, chto staić na marozie, chopić kvadratnych mietraŭ. Adnak niervovaści, jakaja była raniej, niama. Na hanku nievialiki błokpost z tych, chto zajmaŭ raniej za ŭsich, vakoł UKB badziajucca jašče ludzi, ahułam čałaviek z 20—30.
Ale ž čarha pačała farmiravacca jašče ŭviečary 19 śniežnia, kali minułaja partyja kvater była raskuplena. Praŭda, uvieś čas pad dźviaryma UKB stajali tolki niekalki čałaviek — pakupniki ŭsio ž stvaryli śpisy i pa ich niekalki razoŭ u sutki adznačalisia. A kali vyjšła aficyjnaja dekłaracyja ab prodažy, užo ad kožnaj siamji načavała pa pradstaŭniku. I ciapier, zapeŭnivajuć ludzi, pad UKB znachodziacca ŭsie pakupniki, prosta chtości adyšoŭ, chtości hrejecca ŭ mašynach. Uleźci ŭ čarhu ŭ prostaha minaka nie atrymajecca.
Pryčym sustrakajucca ŭ čarzie i tyja, chto ŭžo nabyŭ žyllo ŭ minuły raz.
«Za siabroŭ staim», — tłumačać jany.
Kamientary