Pavieł Biełavus: Dzień Voli treba pierajmienavać u Dzień Biełarusi i śviatkavać jaho na ŭzor irłandskaha Dnia Śviatoha Patryka

Heta maja asabistaja kancepcyja, jakaja naradziłasia paśla #BNR100 «Śviata Niezaležnaści» i zaraz sfarmavałasia ŭ bolš-mienš dakładny vyhlad. Cikava budzie pačuć vašyja dumki i mierkavańni nakont jaje, kab razumieć, u jakim kirunku ruchacca pry płanavańni mierapryjemstvaŭ u nastupnym hodzie.

Dzień Biełarusi!

Liču, što najlepšaj ahulnaj nazvaj dla 25 sakavika budzie — Dzień Biełarusi #belarusday. U nas jość niekalki aficyjnych i nieaficyjnych Dzion Niezaležnaści i blizkich da jaho, jość užo šmathadovy «Dzień Voli». Ale heta ŭsio nie toje. Pa faktu 25 sakavika — heta svojeasablivy Dzień naradžeńnia Biełarusi, dzień pačatku farmavańnia sučasnaj Biełarusi, jaje dziaržaŭnaści, dzień, ź jakoha pačałasia novaja historyja Biełarusi.

Heta prostaja i pryhožaja forma, jakaja moža ŭvasablacca ŭ raznastajnych varyjacyjach. I z ulikam taho, što hałoŭny voklič biełarusaŭ «Žyvie Biełaruś», a žyć Biełaruś pačała jakraz 100 hadoŭ nazad, u tyja časy, darečy, i źjaviŭsia hety voklič. Dy i adkaz na hety voklič «Žyvie viečna!» ciapier hučyć bolš upeŭniena, bo Biełaruś (mienavita Biełaruś, a nie VKŁ, Reč Paspalitaja, Połackaje kniastva) dakładna ŭžo stahodździe žyvie.

Tamu pieršaja prapanova takaja:

pačać kampaniju pa pryznańni 25 sakavika dziaržaŭnym śviatam i śviatočnym dniom z formaj nazvy «Dzień Biełarusi», i paralelna mižnarodnuju kampaniju pa papularyzacyi 25 sakavika jak Mižnarodnaha dnia Biełarusi z karotkaj nazvaj «Belarus day».

Z hetaj kancepcyi moža pačacca jaskravaja i šyrokaja kampanija, jakaja budzie papularyzavać Biełaruś na roznych uzroŭniach.

Na mižnarodnym uzroŭni praviadzieńnie ŭ hetyja dni šmatlikich akcyj i mierapryjemstvaŭ pad ahulnaj nazvaju «Belarus day», pryśviečanych Biełarusi: dyjasparami i biełaruskimi supolnaściami, arhanizacyjami (što ŭžo i tak adbyvajecca šmat hadoŭ), kampanijami ź biełaruskim kapitałam ci stvoranymi biełarusami, pradstaŭnictvami ŭ roznych krainach, dypłamatyčnymi ŭstanovami i dziaržaŭnymi strukturami.

100-hodździe BNR pakazała, što my, biełarusy, na heta zdolnyja, i sotni mierapryjemstvaŭ u roznych kutkach śvietu pra heta śviedčać.

Kali dziaržava budzie supraćstajać i nie padtrymlivać takija inicyjatyvy, to ŭsio adno praz hramadskija inicyjatyvy i mižnarodnyja arhanizacyi damahacca pryznańnia statusa hetaha dnia z zapuskam akcyi «Pavinšuj Biełaruś z dniom naradžeńnia», kab jak zvyčajnyja hramadzianie roznych krain, tak i palityki dy kiraŭniki roznych dziaržaŭ masava vinšavali jak biełarusaŭ, tak i kiraŭnictva krainy na roznych uzroŭniach z hetym dniom.

25 sakavika pavinien stać dniom, kali ŭ śviecie havorać pra Biełaruś, vinšujuć Biełaruś, znajomiacca ź Biełaruśsiu, pryjazdžajuć ci pa vyniku płanujuć pryjezd u našuju krainu.

Što ŭ samoj Biełarusi moža adbyvacca ŭ hety dzień. Kali heta Dzień naradžeńnia, to jon pavinien zajmieć niejkija tradycyi, jakija ŭłaścivyja i dniu naradžeńnia čałavieka.

Heta:

— hałoŭnyja kolery, jakija jość u luboha nacyjanalnaha śviata, — bieły i čyrvony paŭsiul: va ŭbrańni vulic, kramaŭ, budynkaŭ, ludziej;

— tradycyjnyja elemienty: ludzi prychodziać na pracu ci ŭ hości ŭ strojach z nacyjanalnym kałarytam, źbirajucca ŭ kaviarnych dy restaracyjach, dzie razam adznačajuć, hamoniać, śpiavajuć biełaruskija pieśni;

— śviatočnyja paštoŭki, padarunki ŭ nacyjanalnym styli, jakimi biełarusy vinšujuć adzin adnoha, vinšujuć biełarusaŭ ludzi z roznych kutkoŭ śvietu, taki kalektyŭny dzień naradžeńnia dla ŭsich — kali ty i imianińnik, i hość śviata adnačasova, i vakoł usie takija;

— prezientacyja novych praduktaŭ: da hetaha dnia roznyja biełaruskija pradpryjemstvy, vytvorcy, vydaviectvy starajucca prymierkavać vypusk novaha i cikavaha, kab paradavać, a moža i ździvić biełarusaŭ,

— vialikaje štohadovaje nacyjanalnaje śviata ŭ Minsku i inšych haradach Biełarusi, zadača jakoha — paznajomić biełarusaŭ z dasiahnieńniami krainy ŭ roznych śfierach za hod, z novymi i jaskravymi inicyjatyvami, natchnić i zaachvocić.

Dla śviata ja prydumaŭ niekalki nazvaŭ, ale moža być i inšaja:

Novaja Biełaruś — fiestyval Biełarusi novaha stahodździa,

Naša Ŭsio! — pakazać biełaruskaje samim biełarusam,

Open Belarus — adkryć i pakazać Biełaruś.

Kali razvažać pra 2019 hod, to dla praviadzieńnia maštabnaha śviata ŭ Minsku ja baču dźvie sukupnyja łakacyi:

1. Pałac sportu, placoŭka pierad Pałacam sportu i «Halereja Minsk»,

2. Arena Minsk, placoŭka pierad Arenaj i kańkabiežny stadyjon.

Kali nastupnaja data 25 sakavika budzie pryniataja vychodnym i śviatočnym dniom, to ŭsie asnoŭnyja mierapryjemstvy adbuducca bieź źmienaŭ — 25-ha. U inšym vypadku fiestyval projdzie 24-ha sakavika, a 25-ha tolki vialiki viečarovy śviatočny kancert.

Z čaho budzie składacca fiestyval.

Kali pačać padrychtoŭku ŭžo ź viasny 2018-ha, to varta raspłanavać šerah raznastajnych mierapryjemstvaŭ ź finałam u sakaviku 2019-ha.

Asnoŭnyja składniki fiestyvalu (kožnym nakirunkam zajmajucca prafiesijanały i praktyki ŭ hetaj śfiery):

— Biźnies-forum — dyskusijnaja placoŭka, dzie ščyra biez pychi adbyvajecca adkrytaja razmova pra dasiahnieńni, prablemy i pierśpiektyvy Biełarusi, 

— Mastactva — prezientacyja sučasnaha i aktualnaha vizualnaha biełaruskaha mastactva,

— Muzyka — dźvie placoŭki: novaje i aktualnaje (ciaham hodu idzie konkurs u vyniku jakoha lepšyja traplajuć u finalny kancert), lepšaje (śviatočny kancert z udziełam papularnych kalektyvaŭ, haściej i zaprošanych zorak),

— Kamunikacyjnaja placoŭka — prezientacyjnyja stendy roznych kulturnych, hramadskich i palityčnych arhanizacyj, kirmaš idej, dziciačyja placoŭki, kirmaš hatovych praduktaŭ i h.d.

25 sakavika moža ŭ budučym stać jašče bolš značnaj dataj u ahulnym štohadovym kalendary biełarusa. Admietnaj dataj, ź jakoj realna zrabić i nacyjanalny paznavalny brend Biełarusi va ŭsim śviecie, jak irłandski Dzień śviatoha Patryka, jak Kaziukas u Litvie, jak Oktobierfiest u Hiermanii, jak Śviata krasavańnia sakury ŭ Japonii.

Biezumoŭna, što ŭ kožnaha z hetych śviataŭ roznaja historyja, tradycyi i formy, ale kožnaje ź ich źjaŭlajecca brendam krainy, jaki papularyzuje jaje tradycyi na ŭvieś śviet.

Viasnovy čas, kali pračynajecca paśla zimy pryroda i ziamla, čas kali i sam biełarus abudžajecca, mabyć, nie vypadkova ŭ hety čas i była abvieščana niezaležnaść BNR, jakaja i dała žyćcio novaj Biełarusi.

Voś takaja ideja. Čakaju vašych kamientaroŭ, idej i raźvićcia temy.

• 0
• 0
• 0
• 0
• 0
• 0
• 0
• 0