Upieršyniu ŭ historyi znojdzienyja vielmi salonyja padlodnyja aziory
Navukoŭcy z ZŠA, Kanady i Vialikabrytanii vyjavili pad ledavikami na poŭnačy Kanady dva voziery ź vielmi salonaj vadoj. Dahetul byli viadomyja tolki presnavodnyja padlodnyja aziory. Ab svajoj pracy navukoŭcy raspaviali ŭ časopisie Science Advances.
Aziory na hłybini ad 550 da 750 mietraŭ pad pavierchniaj ledavikovaha kupału vyspy Devon (Kanada) navukoŭcy vyjavili z dapamohaj radyjołakacyjnych ustanovak, sihnał ad jakich pa-roznamu adlustroŭvajecca ad roznych pavierchniaŭ. Płoščy vyjaŭlenych azioraŭ — prykładna piać i vosiem kvadratnych kiłamietraŭ adpaviedna.
«U hetaj častcy ledavikovaha kupału vyspy Devon lod pramiarzaje da ziamli, tak što my i nie čakali znajści vady, — raspaviała adna z aŭtaraŭ pracy, aśpirant Albiertskaha ŭniviersiteta Ańjan Rutyšaŭzier. — My bačyli, što radyjołakacyjnyja sihnały kazali ab prysutnaści vady, ale dumali, što vada nie moža zachoŭvacca pad hetym lednikom, dzie tempieratura składaje nižej za -10°C».
Vada ŭ aziorach zastajecca vadkaj pry admoŭnych tempieraturach praz toje, što ŭtrymlivaje vielmi šmat solaŭ — u čatyry-piać razoŭ bolš, čym zvyčajnaja marskaja. Niezvyčajnyja ŭmovy cikavyja navukoŭcam tym, što jany davoli padobnyja da ŭmovaŭ na pakrytych lodam spadarožnikach płaniet Soniečnaj sistemy, naprykład, spadarožnika Jupitera Jeŭropy. Akramia taho, u aziorach mohuć žyć mikraarhanizmy, izalavanyja ad astatniaha śvietu na praciahu dziasiatkaŭ tysiač hadoŭ.
Kamientary