Miedyki daŭno zaŭvažyli, što ŭ žančyn, jakija šmat naradžali, asabliva paśla 4—5 dziaciej, praciahłaść žyćcia ŭ siarednim skaračajecca. Amierykanskija navukoŭcy paćvierdzili heta na malekularnym uzroŭni, pakazaŭšy, što markiery kletkavaha stareńnia chutka nazapašvajucca z kožnym novym dziciem. Pra heta jany pišuć u artykule, apublikavanym časopisam Scientific Reports, pieradaje Naked Science.
Den Ejzienbierh (Dan Eisenberg) i jaho kalehi daśledavali klučavyja i niezaležnyja adzin ad adnaho pakazčyki kletkavaha stareńnia — daŭžyniu ciełamier (kancavych učastkaŭ chramasom, jakija skaračajucca z kožnym dzialeńniem kletki, pakul kančatkova nie błakujuć mahčymaść dzialicca) i epihienietyčnyja markiery (chimičnyja madyfikacyi DNK, jakija nazapašvajucca ź ciaham žyćcia).
Abjektam daśledavańnia stali maładyja žančyny ź Filipin u vieku ad 20 da 22 hadoŭ: bolš za 800 dla pieršaha daśledavańnia i amal 400 — dla druhoha.
Praca pakazała, što markiery stareńnia nazapašvajucca chutčej z kožnymi rodami, pavialičvajučy «bijałahičny viek» kletak žančyny na termin ad paŭhoda da dvuch hadoŭ. Jak ni paradaksalna, ale na praciahu samoj ciažarnaści markiery kletkavaha ŭzrostu, naadvarot, demanstravali niečakanuju časovuju «maładość».
Chutčej za ŭsio, heta źviazana z maštabnymi pracesami pierabudovy imunnaj sistemy, jakija prachodzić arhanizm maci ŭ pieryjad ciažarnaści i paśla jaje. Navukoŭcy taksama adznačajuć, što hetyja efiekty vyjavilisia tak jarka, mahčyma, u suviazi ź ciažkimi ŭmovami žyćcia doślednych, častaha niedachopu ježy i fizičnymi nahruzkami. U raźvitych krainach, dzie deficytu praduktaŭ nie nazirajecca, źmieny mohuć być nie tak jaskrava vyjaŭlenyja.
Kamientary