Ankachvoryja žančyny ŭ Biełarusi zmohuć zamarožvać jajkakletki

Ankachvorym žančynam u Biełarusi płanujecca davać mahčymaść zamarožvać jajkakletki, paviedamiŭ karespandentu BiełTA člen pastajannaj kamisii pa achovie zdaroŭja, fizičnaj kultury, siamiejnaj i moładzievaj palitycy Pałaty pradstaŭnikoŭ Alaksandr Staravojtaŭ.

Heta praduhledžana papraŭkami ŭ zakon ab dapamožnych repraduktyŭnych technałohijach. «Prava zakansiervavać jajkakletki płanujecca davać žančynam, jakim treba pieranieści miedycynskija ŭmiašańni, zdolnyja paŭpłyvać na dzicianaradžalnuju funkcyju, naprykład chimijaterapija, pramianiovaja terapija.

Pakul nabor jajcakletak na zachoŭvańnie ŭ ich niemahčymy: niama miedycynskich pakazańniaŭ dla prymianieńnia dapamožnych repraduktyŭnych technałohij, u pryvatnaści biaspłodździa. Kali ž zakonaprajekt budzie pryniaty, to źviarnucca da pracedury buduć mieć mahčymaść nie tolki ankachvoryja, ale i ŭ tyja, u kaho jość siamiejnaja schilnaść da ankałahičnych patałohij. Pry hetym vyznačajecca, što vykarystoŭvać pałavyja kletki takich pacyjentaŭ možna budzie tolki pry ŭžyvańni ŭ dačynieńni da ich dapamožnych repraduktyŭnych technałohij», — raspavioŭ Alaksandr Staravojtaŭ.

Raspracoŭščyki zakonaprajekta ŭličyli pryvatnyja vypadki, kali dapamahčy biaspłodnaj siamji była hatovaja blizkaja svajačka muža ci žonki, ale nie zmahła hetaha zrabić z-za ŭzrostu. U dziejnym zakanadaŭstvie surahatnaj maci moža być žančyna ad 20 da 35 hadoŭ. «Uzrostavyja miežy ŭ takich vypadkach prapanujecca pašyryć da 49 hadoŭ uklučna», — prainfarmavaŭ Alaksandr Staravojtaŭ. Akramia taho, u zakonaprajekcie dapuskajecca, što takaja žančyna moža nie być zamužam, ale tolki ŭ tym vypadku, kali ŭ jaje jość darosłyja dzieci i niama niepaŭnaletnich.

U prajekcie zakona prapanujecca taksama pavialičyć uzrostavy paroh dla donaraŭ pałavych kletak: z 40 da 50 hadoŭ dla mužčyn i da 49 hadoŭ uklučna — dla žančyn. Pry hetym u pieršym vypadku havorka idzie jak pra ananimnych, tak i pra nieananimnych donaraŭ. U druhim — tolki pra nieananimnych donaraŭ ź liku svajačak pacyjentki. Pavodle słoŭ deputata, pry vyrašeńni pytańnia ab źmianieńni padychodaŭ da abmiežavańnia ŭzrostu donaraŭ uličvalisia i mižnarodnyja padychody, u pryvatnaści rekamiendacyi SAAZ i Jeŭrapiejskaha tavarystva repradukcyi i embryjałohii čałavieka (ESHRE).

Praktyka prymianieńnia zakona pakazała, što ŭ jakaści donarskich vykarystoŭvajucca nie tolki pałavyja kletki, atrymanyja ŭ Biełarusi, ale taksama z rehistraŭ, bankaŭ, baz zamiežnych dziaržaŭ. Papraŭkami ŭ zakon ab DRT arhanizacyi achovy zdaroŭja atrymlivajuć mahčymaść supracoŭničać ź imi. Akramia taho, uvodzicca kantrol za vykarystańniem donarskich kletak, atrymanych z-za miažy.

Alaksandr Staravojtaŭ adznačyŭ, što asnoŭnaja meta zakonaprajekta — udaskanalić rabotu miedustanoŭ, jakija zajmajucca dapamožnymi repraduktyŭnymi technałohijami, aktualizavać narmatyŭnuju bazu, jakoj jany karystajucca. U Biełarusi dziejničajuć try dziaržaŭnyja i kala piaci pryvatnych centraŭ EKA. Prablema biaspłodździa aktualnaja dla krainy. Udzielnaja vaha par, jakija nie mohuć mieć dziaciej, dasiahaje 16—17%.

U raspracoŭcy zakonaprajekta ŭdzielničajuć pradstaŭniki Ministerstva achovy zdaroŭja, hramadskich abjadnańniaŭ, lekary. Płanujecca, što jon budzie pryniaty ŭ pieršym čytańni na vosieńskaj siesii.

• 0
• 0
• 0
• 0
• 0
• 0
• 0
• 0