Piać krain, jakija ŭvachodziać u viadučy raźviedvalny aljans śvietu Five Eyes, z pačatku 2018 hoda abmieńvajucca zasakrečanymi danymi pra dziejnaść Kitaja za miažoj ź dziaržavami-adnadumcami, paviedamlaje Reuters.
Pašyreńnie supracoŭnictva aljansu, u jaki ŭvachodziać Aŭstralija, Brytanija, Kanada, Novaja Ziełandyja i ZŠA, z takimi krainami, jak Hiermanija i Japonija, śviedčyć pra supraciŭleńnie kitajskim inviestycyjam i sprobam umiešvacca ŭ žyćcio inšych krain.
Choć u centry ŭvahi aljansu i sajuźnikaŭ znachodzicca Kitaj, pieramovy taksama zakranajuć Rasiju.
«Kansultacyi z našymi sajuźnikami, z partniorami-adnadumcami, pra toje, jak adkazvać na naporystuju mižnarodnuju stratehiju Kitaja, byli častymi i nabirajuć abaroty», — skazaŭ Reuters amierykanski čynoŭnik.
Kitaj, jaki sutyknuŭsia z uzmacnieńniem krytyki z boku Vašynhtona, Kanbiery i inšych stalic, abviarhaje abvinavačvańni ŭ sprobach paŭpłyvać na zamiežnyja ŭrady i ŭ tym, što jaho inviestycyi źjaŭlajucca palityčna matyvavanymi.
Pašyreńnie supracoŭnictva z boku Five Eyes kaža pra toje, što, niahledziačy na zajavy prezidenta ZŠA Donalda Trampa pra hatoŭnaść adnamu supraćstajać Kitaju, ludzi ź jaho administracyi viaduć aktyŭnuju pracu ŭ kułuarach dla stvareńnia niefarmalnaj kaalicyi dla strymlivańnia Piekina.
Kamientary