«My pavažajem svaich hierojaŭ, ale ich nie kuplajuć». Ramieśniki raspaviali, čamu ŭ centry Hrodna pradajuć partrety Pucina
Na hrodzienskaj «piešachodcy» čaho tolki nie pradajuć: ad suvienirnych čarapoŭ ručnoj pracy da partretaŭ viadomych futbalistaŭ i palitykaŭ. Siarod apošnich akazaŭsia i partret prezidenta Rasii Uładzimira Pucina. Hrodna.life daviedaŭsia, čamu ramieśniki pradajuć vyjavy zamiežnych palitykaŭ, a pra svaich vydatnych dziejačaŭ zabyvajuć.
Partret Pucina pradajuć usiaho za 10 rubloŭ. Pobač ź im — słavutaści Hrodna i partret futbalista Kryšcijanu Ranałdu. Aŭtar rabot kaža, što karciny z suśvietnymi znakamitaściami razychodziacca dobra.
«Tak, Pucin nijakaha dačynieńnia da našaha horada nie maje, ale ja taščusia ad jaho, voś i maluju. Jaho partrety ludzi kuplajuć. Vy viedajecie, što heta, kali karciny voziš ceły hod, a ich nichto nie kuplaje? U nas svaje hieroi i dobraje mastactva, ale heta tut nikomu nie treba, a karcinu z Pucinym ci Ranałdu kuplajuć turysty. Najlepšy turyst u Hrodnie — ruski, hetym usio skazana. Mienavita hości z Rasii bolš za ŭsio ŭ nas biaruć», — raspaviadaje aŭtar rabot.
Da dyjałohu mastaka z žurnalistam vyrašyŭ dałučycca jašče adzin ramieśnik. Karciny z Pucinym jon nie pradaje, ale kaža pra prablemu, ź jakoj sutykajecca štodnia na piešachodnaj vulicy.
«My pavažajem Batoryja, jaki źviazvaje nas ź Litvoj i Polščaj, ale turysty z hetych krain trasucca za kožnuju kapiejku. Jany nie kuplajuć takija karciny, naohuł ničoha nie biaruć. Za niejki mahnit, jaki kaštuje 1,5 rubla, jany prosiać źnižku. Nu jak tak možna? A partrety našych karaloŭ i kniazioŭ davodzicca vazić hadami, ale ich nichto nie kuplaje, navat miascovyja. Kamu heta treba?
Partrety Pucina heta nie naša žadańnie, byccam my chočam jaho papularyzavać, prosta my vymušanyja heta rabić, na heta jość popyt i nam taksama treba niejak žyć. Sumna, ale siońnia takija realii. I jak by my da Pucina ni stavilisia, jon užo ŭpisaŭ svajo imia ŭ historyju. Usio roŭna, lubić jaho chto-niebudź ci nie, heta suśvietnaja i histaryčnaja asoba».
Ramieśniki kažuć, što pradavać partrety suśvietnych asob siońnia ekanamična bolš vyhadna, čym partrety viadomych dziejačaŭ biełaruskaj historyi. Za adzin partret Pucina jany prosiać usiaho 10 rubloŭ.
«U pieršuju čarhu nie my pavinny pačynać prasoŭvać svajo, a naša dziaržava, — dadaje ramieśnik. — Kali svaich hierojaŭ, takich jak Davyd Haradzienski, Vitaŭt, Batoryj, toj ža Bykaŭ, pa miascovym telebačańni i radyjo nie kruciać, to nam adnym nie pad siłu heta rabić. U nas jość svaja historyja i nacyjanalnyja simvały, ale ich pakul nie pavažajuć na dziaržaŭnym uzroŭni. Mnie zdajecca, chutka pryjdzie čas, kali my vierniem svaje simvały i hierojaŭ, ale pakul pavinny čakać i niejak vyžyvać».
Kamientary