Abvał

U mnohich halinach pramysłovaści Biełarusi ŭ listapadzie ŭ paraŭnańni z kastryčnikam nazirałasia źnižeńnie abjomaŭ vypusku pradukcyi, paviedamiŭ Nacyjanalny statystyčny kamitet.

U cełym spad vytvorčaści ŭ listapadzie ŭ paraŭnańni z kastryčnikam skłaŭ 13,8%.

Padzieńnie adbyłosia ŭ mašynabudavańni i mietałaapracoŭcy — na 20,6%, u lasnoj, drevaapracoŭčaj i celułozna‑papiarovaj pramysłovaści — na 11,5%, u pramysłovaści budaŭničych materyjałaŭ — na 9,8%, lohkaj pramysłovaści — na 9,5%, chimičnaj i naftachimičnaj — na 9,3%, u charčovaj pramysłovaści — na 5,8%.

U paliŭnaj pramysłovaści abjom vytvorčaści zastaŭsia na ŭzroŭni kastryčnika, u čornaj mietałurhii pavialičyŭsia na 5,5%, u elektraenierhietycy — na 14%.

Pavodle prahnozu sacyjalna‑ekanamičnaha raźvićcia na 2008 hod abjom pramysłovaj pradukcyi pavinien uzraści na 11%. Choć vyniki studzienia-listapada proci studzienia-listapada minułaha hodu jašče pakazvajuć rost za košt bumu pieršych miesiacaŭ, užo jasna, što na zaplanavany vysoki ŭzrovień vyjści budzie ciažkavata. Rost pa vynikach hodu budzie, ale adnaznačny.

Prahnozy davoli piesimistyčnyja: ekśpierty kažuć pra mahčymy dalejšy spad pramysłovaje vytvorčaści ŭ Rasii na 10% ciaham apošniaha miesiaca hodu. Miž tym usie apošnija miesiacy biełaruskaja ekanomika faktyčna paŭtarała pakazčyki rasijskaj, tolki z łaham adzin-dva miesiacy. I inšaje adroźnieńnie: Biełaruś rastračvaje svaje valutnyja reziervy trochi chutčej za Rasiju. Heta vydatki kursu na zachavańnie poŭnaje zaniataści navat koštam pracy na skład.

Pryčyna padzieńnia valutnych reziervaŭ - u katastrafičnym padzieńni pastupleńniaŭ ad impartu. Jany źmienšylisia ad prykładna 4 młrd u červieni da 2,4 młrd dalaraŭ u listapadzie. Pryčym padzieńnie praciahvajecca: listapadaŭski pakazčyk na 20% nižejšy za vieraśnioŭski. Heta stvaraje deficyt valuty.

Takoha spadu Biełaruś nie viedała ad pačatku 1999 hodu — tady adbilisia nastupstvy rasijskaha defołtu 1998 hodu. Što da pramysłovaj vytvorčaści, to takoha rezkaha skaračeńnia za adzin miesiac nie fiksavałasia ani ŭ 1999-m, ani ŭ samyja ciažkija miesiacy ekanamičnaha kryzisu ŭ 1992—1994 hadach. Apošni raz pramvytvorčaść padała hetak rezka ŭ časie vajny.

Miž tym u Rasii sapraŭdny kryzis pačniecca tolki z pačatku nastupnaha hodu, asabliva ciažkaj budzie pieršaja pałova, miarkujuć ekśpierty. Recesija zakranie ŭsie haliny ekanomiki. A Biełaruś zastajecca pryviazanaja da rasijskich rynkaŭ zbytu, tamu niepaźbiežna pacierpić ad ich padzieńnia.

Možna z peŭnaściu pradkazać, što śniežańskija pakazčyki buduć jašče horšyja za listapadaŭskija. Kali ŭ adzinaccatym miesiacy absalutnaja bolšaść pradpryjemstvaŭ pracavała, choć niekatoryja - na skład, u dvanaccatym upieršyniu za doŭhija hady pracoŭnikaŭ mnohich zavodaŭ čakajuć kaladnyja adpačynki z zachavańniem dźviuch tracinaŭ zarobku. Jany nie tolki źniziać pakazčyki vału, ale i padarvuć finansavy stan najmalnikaŭ.

U minułyja hady ŭ takich vypadkach ułady časova pačynali prykryvać statystyku.

• 0
• 0
• 0
• 0
• 0
• 0
• 0
• 0