«Biełkamunmaš» pradstaviŭ svaju apošniuju raspracoŭku — elektrobus, stvorany ŭ kuzavie samaha masavaha 321-ha tralejbusa. Navinka, jakaja atrymała indeks E321, užo prajšła ŭsie zapłanavanyja vyprabavańni i rychtujecca da pieradačy staličnym transpartnikam — da Jeŭrahulniaŭ-2019 Minsk pavinien atrymać 32 takija mašyny, piša ABW.BY.
Madel E321 maje supierkandensatary i chutkuju zaradku — padsiłkoŭvacca E321 budzie z dapamohaj vysoŭnaha pantohrafa ad zaradnych stancyj, ustanoŭlenych na kancavych prypynkach.
Adroźnieńni ad 321-ha tralejbusa pa eksterjery nie kardynalnyja, ale ŭsio ž majucca. U elektrobusa E321 bolš sučasny dyzajn bakavin, falšborty pa pierymietry dachu, inšaja forma kołavych arak i novaja zadniaja častka.
Unutry sałona ŭhadvajecca 321-y tralejbus. Ale i adroźnieńniaŭ šmat — interjer byŭ pierapracavany. Adrazu kidajucca ŭ vočy aryhinalnyja paneli na stoli, novyja siadzieńni, užo znajomyja pa «Vitaŭtach». U ścienku elektrašafy zzadu kabiny kiroŭcy ŭbudavany manitor, na jaki budzie vyvodzicca infarmacyja ab maršrucie, a taksama demanstravacca rekłamnyja roliki.
Sałon staŭ trochi karaciejšym, źmianiłasia jaho płaniroŭka. Tym nie mienš siadziačych miescaŭ pa-raniejšamu 26. A voś stajačych miescaŭ mienš — 56 z ulikam adnaho miesca dla invalidnaj kalaski. Takim čynam, ahulnaja pasažyraŭmiaščalnaść elektrobusa — 83 čałavieki (u 321-ha tralejbusa — 101).
Mienšaja pasažyraŭmiaščalnaść elektrobusa tłumačycca bolšaj masaj: 12.700 kh suprać 11.100 kh u tralejbusa. Pryčyna ŭ supierkandensatarach. Zatoje dziakujučy hetym ža supierkandensataram elektrobus E321 moža prajechać biez padzaradki 30 kiłamietraŭ.
Čas zaradu ŭ novaha elektrobusa — 5—8 chvilin.
Ciapier čytajuć
Zialenski ŭ Vilni: Pakul špic Łukašenki maje bolš pravoŭ, čym narod Biełarusi17
Kamientary