Trom fanatam minskaha «Tarpieda» prysudzili hihanckija turemnyja terminy za bojku
Dva dziasiatki fanataŭ vyjšli da stadyjona «Tarpieda» ŭ Minsku ź biełaruskamoŭnaj raściažkaj «Dzieviać hadoŭ za toje, što fanat. Patap. Vova. Zvon».
Hetkim čynam fanaty «Tarpieda» vyrašyli praciahnuć uvahu hramadskaści da prysudaŭ, jakija niadaŭna byli vyniesienyja ich paplečnikam.
Historyja biare pačatak letam 2017-ha. Hrupa fanataŭ «čorna-biełych» viartałasia ź Ivacevičaŭ, dzie prachodziŭ kubkavy matč ich kamandy. «Tarpieda» pieramahło ŭ toj hulni z bujnym likam 6:0 i prajšło ŭ nastupny raŭnd.
Sutyčka adbyłasia na terytoryi Staŭbcoŭskaha rajona na adnoj z zapravak. Tavaryšy zatrymanych kažuć, što nijakich istotnych traŭmaŭ naniesiena nie było. «Było parvanaje adzieńnie, a taksama krychu pabity aŭtamabil. Usia škoda była kampiensavanaja», — raskazvaje adzin z fanataŭ.
U chutkim časie siłaviki identyfikavali i zatrymali fanataŭ. Užo amal paŭtara hoda jany znachodziacca ŭ źniavoleńni. «Vy ž viedajecie, jak pracuje HUBAZiK. Užo i tyja paciarpiełyja nijakich pretenzij nie mieli, ale na ich nacisnuli, kab dali pakazańni», — kaža inšy prychilnik «Tarpieda».
Pra zatrymanych raskazvajuć, što heta zvyčajnyja chłopcy ź minskaha rajona Aŭtazavod. «U adnaho jość siamja, dzicia. Inšy pracavaŭ u banku, jašče adzin — aŭtaślesar», — kažuć našy surazmoŭcy.
Spačatku spravu razhladaŭ Staŭbcoŭski rajonny sud, ale paśla skarhaŭ jana była nakiravanaja ŭ Minsk. U vyniku chłopcy byli asudžanyja pa artykule 339 č. 3 «Chulihanstva z prymianieńniem zbroi dla pryčynieńnia cialesnych paškodžańniaŭ», jašče dvaich asudzili pa artykule 218 č. 3 «Naŭmysnaje źniščeńnie ci paškodžańnie majomaści, ździejśnienyja arhanizavanaj hrupaj».
Pieršy prysud byŭ šakujučy dla ŭsich — adzin zatrymany atrymaŭ 9 hadoŭ źniavoleńnia, a jašče dvoje pa 8,5 hoda. Zrešty, na paŭtornym sudzie adnamu z abvinavačanych udałosia «skinuć» try hady. U vyniku fanaty atrymali 9, 8,5 i 5,5 hadoŭ.
8 lutaha budzie razhledžanaja jašče adna skarha fanataŭ. Kali sudździa jaje nie zadavolić, to fanaty adpraviacca ŭ kałoniju.
Raniej da 2 hadoŭ 4 miesiacaŭ źniavoleńnia za raspalvańnie varažniečy i raspaŭsiud parnahrafii byŭ prysudžany adzin ź lidaraŭ fanackaha rucha minskaha «Dynama» Vital «Puma». Heta pryviało da taho, što fanaty «Dynama» stali bajkatavać hulni kamandy, ich siektar pustuje na stadyjonie ŭžo dva hady.
Fanaty «Tarpieda» nie źbirajucca dałučacca da bajkotu: «Heta ni da čaho nie pryviadzie. Milicyja tolki zadavolenaja budzie, što nichto nie chodzić na siektar».
U 2017 hodzie da vializnych terminaŭ za bojku z «tarpiedaŭcami» taksama byli asudžanyja fanaty MTZ-RIPA («Partyzan»). Siarod ich byŭ i Illa Vałavik, jon atrymaŭ 10 hadoŭ źniavoleńnia za bojku.
Možna kanstatavać, što prysudy dla fanataŭ zvyčajna bolš žorstkija, čym dla hramadzian, jakija traplajuć pa tych ža artykułach na łavu padsudnych, ale nie naležać da subkultury ultras.
Kamientary