Salisty NaviBand pračytajuć biełarusam nieviadomy tekst Andrusia Horvata na «Ahulnaj dyktoŭcy»
Biełarusy 1 červienia zmohuć pravieryć vałodańnie rodnaj movaj i napisać «Ahulnuju dyktoŭku» pa novym tekście sučasnaha biełaruskaha piśmieńnika Andrusia Horvata. U jakaści čytalnikaŭ vystupiać salisty hurta NaviBand. Prajekt u padtrymku biełaruskaj movy pravodzić kampanija «Lidskaje piva», prymierkavaŭšy jaho da 400-hodździa vychadu «Hramatyki» Mialecija Smatryckaha.
Sioleta śpiecyjalna dla «Ahulnaj dyktoŭki» tekst padrychtavaŭ Andruś Horvat. Knihi piśmieńnika źjaŭlajucca biestsielerami sučasnaj biełaruskaj litaratury, a pjesa pa knizie «Radziva Prudok» užo amal hod z anšłaham prachodzić na kamiernaj scenie Kupałaŭskaha teatra. Darečy, akciory teatra taksama padtrymali akcyju i navat źniali nievialiki rolik z zaprašeńniem pryniać udzieł u dyktoŭcy.
Aŭtar tekstu i arhanizatary akcyi pastavili pierad saboj metu nie tolki dać mahčymaść udzielnikam pravieryć svaje viedy, ale i pakazać pryhažość, samabytnaść i raznastajnaść biełaruskaj movy.
U roli «nastaŭnikaŭ» na «Ahulnaj dyktoŭcy» vystupiać salisty hurta NaviBand. Vybar nievypadkovy: Arciom i Ksiuša pastajanna vykarystoŭvać biełaruskuju movu ŭ svajoj tvorčaści i znosinach z prychilnikami, a taksama pieršymi ŭ historyi Jeŭrabačańnia vykanali kampazicyju pa-biełarusku.
Napisać dyktoŭku možna ŭ Nacyjanalnaj biblijatecy abo doma. Nieabchodna tolki zahadzia zarehistravacca na staroncy prajekta. Sama dyktoŭka pačniecca 1 červienia roŭna a 12-j hadzinie i budzie tranślavacca na radyjo «Kultura» (102,9 FM u Minsku, 88,5 FM u Breście, 99,3 FM u Viciebsku, 91,5 FM u Homieli, 95,0 FM u Hrodnie i 99,1 FM u Mahilovie).
Pravierać pracy prafiesijnyja fiłołahi. Vyniki dyktoŭki buduć dasłany kožnamu indyvidualna razam z elektronnym siertyfikatam ab udziele. Dla žadajučych pravieryć siabie samastojna aryhinał tekstu apublikujuć na staroncy prajekta praź niekalki dzion paśla dyktoŭki. Vydatniki atrymajuć pamiatnyja pryzy ad arhanizataraŭ.
Prajekt «Ahulnaja dyktoŭka» ŭ 2019 hodzie pravodzicca kampanijaj «Lidskaje piva» pry padtrymcy kanała «Kultura» Biełaruskaha radyjo.
Šrajbman z kalehami prapanavali pakrokavy płan deeskałacyi adnosin Biełarusi i ES53
Kamientary