Chto jość kim i što jość čym u Litvie paśla vybaraŭ — tłumačyć biełarus, jaki žyvie ŭ Vilni

«Niezaležna ad taho, čym skončycca druhi tur, nastupnym prezidentam Litvy budzie prajeŭrapiejski libierał-centryst. Mienavita tak možna acharaktaryzavać jak Inhrydu Šymanicie, tak i Hitana Naŭsiedu, — tłumačyć Andruś Chrapavicki.

Palityka Litvy datyčna Biełarusi nie źmienicca, chto b ź ich nie pieramoh u druhim tury.

Na moj pohlad, Šymanicie i Naŭsieda — najlepšyja kandydaty z usich tych, chto bałatavalisia. Kandydaty z sumnieŭnymi i mutnymi pohladami zastalisia daloka zzadu.

Uličvajučy, što adna z hałoŭnych rolaŭ prezidenta Litvy — vyznačać zamiežnapalityčny viektar krainy, aboje favaryty havorać pa-anhielsku davoli biehła, ich mierkavańnie pa bolšaści pytańniaŭ zamiežnaj palityki vielmi blizkaje.

Mabyć, nie zusim vidać ź Biełarusi, ale cikava nazirać za evalucyjaj Sajuza Ajčyny — Litoŭskich chryścijanskich demakrataŭ. Paśla karupcyjnaha skandału ŭ Libieralnym sajuzie (Liberalų sąjūdis) u Litvie, zdavałasia b, skłaŭsia peŭny vakuum na libieralnaj častcy palityčnaha pola, ale mienavita litoŭskija kansiervatary ŭmieła pieraciahnuli ładnuju častku libieralnaha elektaratu. Tłumačycca heta chiba tym, što Sajuz Ajčyny maje prynamsi dva ŭnutranyja łahiery: adzin chryścijanska-kansiervatyŭny, druhi — libieralny (u jeŭrapiejskim sensie hetaha słova). I kiraŭnik partyi Habryelus Łanśbierhis i Inhryda Šymanicie naležać da druhoha łahiera.

Ciaham prezidenckaj honki Šymanicie, kandydatka ad Sajuza Ajčyny, navat vykazałasia za dekryminalizacyju lohkich narkotykaŭ i ŭzakońvańnie adnapołych partniorstvaŭ.

Ale mahčyma ŭžo chutka ŭ Litvie źjavicca i novaja sapraŭdy libieralnaja partyja. Jaje stvarajuć deputat Aŭšrynie Armanajcie i mer Vilni Remihijus Šymašus. Pracoŭnaja nazva — «Partyja svabody». Pytańnie ciapier u tym, ci paśpieje novaja partyja zarehistravacca da parłamienckich vybaraŭ, jakija musiać adbycca ŭ nastupnym hodzie. Ale nie vyklučana, što vybary adbuducca i daterminova, pra što zajaŭlaŭ staršynia kirujučaj partyi Ramunas Karbaŭskis.

Ahułam vybary ŭ Litvie byli davoli nudnymi, i heta dobra. Tut nie było nijakaha ekzistencyjnaha kryzisu, nie było pryčyn turbavacca ab vynikach.

Ciapier paru słovaŭ pra dva refierendumy, jakija išli razam z vybarami.

Adzin — pra źmianšeńnie kolkaści deputataŭ — byŭ davoli papulisckim krokam kirujučaj partyi. Asnoŭnyja apazicyjnyja siły ahitavali za bajkot albo hałasavać suprać. U vyniku refierendum nie adbyŭsia.

Druhi — pra padvojnaje hramadzianstva. U dadzienym vypadku refierendum adbyŭsia, ale nie chapiła hałasoŭ, kab možna było ŭnieści źmieny ŭ Kanstytucyju. Zdavałasia b, kali b u Litvie ŭzakonili dvajnoje hramadzianstva — heta byŭ by krok napierad u płanie svabodaŭ čałavieka. Ale farmuloŭka refierendumu vielmi abmiežavalnaja. Prava na padvojnaje hramadzianstva zajmieli b tolki tyja litoŭcy, jakija naradzilisia ŭ Litvie, ale stali hramadzianami inšych krain NATA i ES. Usie inšyja byli faktyčna hramadzianami druhoha hatunku. Ale hramadzianie pavinny mieć roŭnyja pravy i abaviazki. Tamu padobnaja redakcyja moža razhladacca jak dyskryminacyjnaja.

Što dalej? Premjer-ministr Saŭlus Skviernialis užo zajaviŭ, što sydzie ŭ adstaŭku ŭ lipieni. Zastajecca intryha, ci buduć daterminovyja parłamienckija vybary, a taksama jak blizkija pa pohladach kandydaty padzielać hałasy tych, chto za ich nie hałasavaŭ u pieršym tury», — tłumačyć Andruś Chrapavicki.

• 0
• 0
• 0
• 0
• 0
• 0
• 0
• 0