Mašynu pasolstva Izraila pabačyli ŭ restaranie ŭ Kurapatach. Pasoł: Za pryvatnym žyćciom supracoŭnikaŭ nie sočym
Hrodzienski žurnalist Dzianis Ivašyn apublikavaŭ u fejsbuku infarmacyju, što 14 červienia ŭ restaranie «Pajedziem, pajadzim» była zaŭvažanaja mašyna z dypłamatyčnymi numarami. Jak potym vyśvietliłasia, heta byŭ aŭtamabil pasolstva Izraila ŭ Biełarusi.
La restarana «Pajedziem, pajadzim» užo bolš za hod idzie supraćstajańnie aktyvistaŭ i ŭłaśnikaŭ zabaŭlalnaha miesca. Aktyvisty ličać, što takaja ŭstanova ŭ niepasrednaj blizkaści ad miemaryjału Kurapaty nie moža isnavać. Štodnia la «Pajedziem, pajadzim» prachodzić pikietavańnie.
Mnohija viadomyja ludzi, u tym liku pradstaŭniki ŭłady, IT-siektara, kulturnyja dziejačy, palityki zaznačali, što ličać niemetazhodnym prychodzić u hety restaran.
Što ž rabiŭ aŭtamabil pasolstva Izraila ŭ sumnaviadomym restaranie? Pra heta «Naša Niva» spytała ŭ pres-sakratarki pasolstva Viery Dziemidzienki. Jana pieradała słovy pasła Izraila Ałona Šahama: «Aficyjnych vizitaŭ i mierapryjemstvaŭ u hetym restaranie nie było. A pryvatnaje žyćcio supracoŭnikaŭ my nie adsočvajem», — tak byli pieradadzienyja słovy pasła.
Pavodle abaroncaŭ Kurapataŭ, heta nie pieršy vypadak, kali mašyna z dypłamatyčnymi numarami była zaŭvažanaja ŭ «Pajedziem, pajadzim». Raniej takaja ž situacyja zdarałasia z aŭtamabilem z aŭtaparka hruzinskaj ambasady.
Kamientary