Hałoŭnaha inžyniera MZKC, jakoha trymali pad śledstvam bolš za čatyry hady, znoŭ apraŭdali — i narešcie vyzvalili
Siońnia sud Pieršamajskaha rajona Minska abviaściŭ prysud Andreju Hałavaču, jaki znachodzicca za kratami ŭžo 50 miesiacaŭ. Jaho pryznali nievinavatym ŭ atrymańni chabaraŭ i złoŭžyvańni ŭładaj. Hałoŭny inžynier MZKC rekardsmien pa časie, praviedzienym u SIZA, choć pa pieršaj spravie jon byŭ apraŭdany ŭ sudzie trojčy, piša Tut.by.
— Nie vinavaty, — taki prysud u dačynieńni da hałoŭnaha inžyniera MZKC u piatnicu, 19 lipienia, pastanaviŭ sud Pieršamajskaha rajona.
Napiaredadni prakuror Juryj Šarśnioŭ zajaviŭ: vina Hałavača dakazanaja ŭ poŭnym abjomie, jon paprasiŭ sud pryznać fihuranta vinavatym i prysudzić da 9 hadoŭ pazbaŭleńnia voli ŭ kałonii va ŭmovach uzmocnienaha režymu z kanfiskacyjaj majomaści. Abaroncy hałoŭnaha inžyniera MZKC kazali pra advarotnaje. Nivodny z čatyroch chabaradavalnikaŭ nie źjaviŭsia na praces, ich pakazańni padčas papiaredniaha rasśledavańnia niepaśladoŭnyja i supiarečlivyja, niama ni videa, ni aŭdyjazapisu, jakija b paćviardžali, što Hałavač braŭ chabar. Tamu ich padabaronnaha treba apraŭdać pa ŭsich punktach abvinavačvańnia.
Vysłuchaŭšy ŭsie baki, sud pajšoŭ u daradčy pakoj na dva dni. Siońnia sudździa Śviatłana Čarapovič abviaściła prysud. Andrej Hałavač pryznany nievinavatym pa pa č. 2, 3 art. 430 KK (Atrymańnie chabaru ŭ asabliva bujnym pamiery), č. 2 art. 424 (Złoŭžyvańnie ŭładaj abo słužbovymi paŭnamoctvami), i sud pastanaviŭ jaho apraŭdać.
— Na moj pohlad, hetaja sprava składajecca z adnych sumnievaŭ. (…) Ja vieru, što vysoki sud prymie spraviadlivaje rašeńnie i ŭvieś hety kašmar skončycca, — kazaŭ u svaim apošnim słovie Andrej Hałavač.
Ciapier u hałoŭnaha inžyniera MZKC jość prava źviartacca ŭ sud pazovam ab kampiensacyi maralnaj škody ŭ suviazi z utrymańniem u SIZA pa pieršaj spravie.
— Sama sprava, jakuju my siońnia raźbirajem, zaviedziena 5 lutaha 2018 hoda — praz 15 chvilin paśla abviaščeńnia apraŭdalnaha prysudu. Mianie zatrymlivaŭ toj ža śledčy, jaki vioŭ spravu, pa jakoj ja byŭ apraŭdany. Heta naohuł stavić pad sumnieŭ abjektyŭnaść praviadzieńnia śledstva, — kazaŭ 16 lipienia padčas pracesu Andrej Hałavač.
Nahadajem, jon byŭ zatrymany ŭ budynku suda adrazu ž paśla abviaščeńnia apraŭdalnaha prysudu. Na hety raz, pa viersii śledstva, atrymaŭ u jakaści chabaru 192 200 dalaraŭ, 35 tysiač jeŭra i «mieŭ namier atrymać jašče 240 tysiač dalaraŭ», ale nie paśpieŭ, tamu što byŭ zatrymany.
Kamientary