Kiraŭnik MUS Estonii abraziŭ premjer-ministarku Finlandyi. Daviałosia vybačacca i byłomu, i siońniašniamu prezidentam
Kiraŭnik MUS Estonii, staršynia Kansiervatyŭnaj narodnaj partyi Mart Chielmie ŭ niadzielu adreahavaŭ na toje, što ministra transpartu i suviazi krainy 34-hadovuju Sanu Maryn pryznačyli na pasadu premjera Finlandyi. U efiry adnoj z radyjostancyj jon zajaviŭ, što «pradaŭščyca padniałasia da premjer-ministra». Daŭniej Maryn pracavała mienavita kasirkaj u kramie.
Na dumku ministra, ad takoha pryznačeńnia vałasy ŭstajuć dybaram.
«Ja ŭ suviazi z hetym nahadaŭ by słovy Uładzimira Uljanava-Lenina pra toje, što lubaja kucharka moža stać ministram, ci jak jon tam vykazaŭsia», — skazaŭ Chielmie.
Sana Maryn prakamientavała vykazvańnie estonskaha ministra nastupnym čynam:
«Ja vielmi hanarusia Finlandyjaj. U majoj krainie dzicia ź biednaj siamji moža atrymać adukacyju i damahčysia pośpiechu ŭ žyćci. I praŭda, pradaŭščyca moža ŭ vyniku stać navat premjer-ministram. Biez rabočych Finlandyja ničoha b nie zmahła. Ja hłyboka pavažaju kožnaha rabotnika, kožnaha pracadaŭcu i pracu pradprymalnikaŭ!» — adznačajecca ŭ kamientary Sany Maryn.
Vykazvańnie Marta Chielmie vyklikała abureńnie ŭ samoj Estonii. Sacyjał-demakraty zapatrabavali jaho adstaŭki z pasady ministra. Padvierhli rezkaj krytycy vykazvańnie były prezident Estonii Toomas Chiendryk Ilvies i były ministr zamiežnych spraŭ Urmas Paet.
«Biesprecedentnaj abrazaj u adras urada Finlandyi kiravańnie źniešniaj palitykaj Estonii pierajšło ad prezidenta, ad premjer-ministra i ad ministra zamiežnych spraŭ u ruki Ministerstva ŭnutranych spraŭ. Ciapier važnyja zajavy pastupajuć mienavita adtul», — napisaŭ Ilvies u niadzielu ŭviečary ŭ Tvitery.
Vybačyłasia i prezident Estonii Kierści Kaljułajd.
Jak ŭdakładniajecca, z padačy estonskaha boku, prezidenty parazmaŭlali pa telefonie. U chodzie razmovy Kaljułajd pryniesła prabačeńni. Lidar Finlandyi pa jaje prośbie pieradała vybačeńni Sanie Maryn, a taksama ŭradu.
Cichanoŭskaja i Zialenski ŭpieršyniu praviali sustreču. Zialenski zaprasiŭ Śviatłanu ŭ Kijeŭ14
Kamientary