Supracoŭnik u cyvilnym sarvaŭ šaryki, łopnuŭ ich i kinuŭ u śmietnicu: jak niekalki dziasiatkaŭ milicyjanieraŭ razahnali akcyju ŭ Maładziečnie
Učora ŭviečary, 23 žniŭnia, u Maładziečnie na Centralnaj płoščy sabrałasia kala 100 čałaviek. U vyniku ich razahnali dva dziasiatki milicyjanieraŭ, piša Rehijanalnaja hazieta.
Na Centralnaj płoščy ŭ Maładziečnie znachodziłasia kala sta čałaviek pad parasonami. Uviečary ŭ horadzie išoŭ doždž. U niekatorych byli bieł-čyrvona-biełyja ściahi i šaryki.
Ludzi sabralisia kala pomnika Leninu. Tady da natoŭpu padyšli čatyry supracoŭniki milicyi ŭ formie, dva — u cyvilnym. Adzin z supracoŭnikaŭ papiaredžvaŭ u miehafon, kab ludzi razyšlisia. Dva supracoŭniki — adzin u cyvilnym, a druhi ŭ formie — zdymali ludziej na videakamiery.
Milicyjaniery kažuć, što pa siońniašniaj akcyi ŭžo pačali administracyjnyja spravy. Havorka išła pra šeście.
U miehafon prahučała: «Nie stvarajcie sabie prablem».
Adznačym, što mabilny internet nie pracavaŭ.
Potym da natoŭpu vyjšli dva dziasiatki milicyjanieraŭ, jany abyšli ŭsiu płošču, a ludzi pajšli ŭ roznyja baki — da rynku, na Vialiki Haściniec i da haścinicy. Pa płoščy prachodzili ludzi ź bieł-čyrvona-biełymi ściahami, ale milicyjaniery nie padychodzili da ich i nie zatrymlivali.
Kali ludzi razyšlisia, supracoŭnik maładziečanskaj milicyi Siarhiej Hambicki, jaki byŭ u cyvilnym pobač ź milicyjanieram ź miehafonam pierad natoŭpam, sarvaŭ sa słupa šaryki, łopnuŭ ich i vykinuŭ u śmietnicu. Na hetym akcyja zaviaršyłasia.
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj32
Kamientary