Aštrafavali žychara Pružanaŭ, jaki pryjšoŭ na mitynh z čyrvona-zialonym ściaham
U žniŭni žychar Pružanaŭ Vital Kulhaŭčuk vyjšaŭ na vulicu z čyrvona-zialonym ściaham na plačach. A 16 kastryčnika sud pryznaŭ jaho vinavatym va ŭdziele ŭ niezakonnym masavym mierapryjemstvie.
«U toj dzień, 24 žniŭnia, mitynhaŭ nie było, ludzi prosta hulali ŭ centry horada, — raspaviadaje Vital.
— Ja išoŭ na sustreču ź siabram. Maja pazicyja — my, biełarusy, niepadzielnyja, adzin narod. Tamu ŭ mianie na plačach byŭ čyrvona-zialony ściah.
Łozunhaŭ nijakich ja nie vykrykvaŭ, ničoha takoha.
A 7-j viečara ja sustreŭsia ź siabram. Na płoščy byli jašče ludzi — ale bieź simvoliki, biez łozunhaŭ. Padyšła milicyja, adzin ź videakamieraj, druhi pačaŭ papiaredžvać pra adkaznaść za niesankcyjanavanyja mitynhi. Ludzi pačali adkazvać im, što heta nijaki nie mitynh.
Milicyjant skazaŭ: ja vas papiaredziŭ — i syšoŭ. A praz dva dni mnie ŭručyli paviestku. Ja pryjšoŭ u RAUS, na mianie skłali administratyŭny pratakoł».
Nieŭzabavie musiŭ prajści sud, ale razhlad spravy Kulhaŭčuka adkłali.
«Bo 9 žniŭnia mianie zatrymlivali, i dali aryšt na 5 sutak. Ja jaho adbyŭ, ale abskardžvaŭ tyja sutki. Sudździa vyrašyŭ pačakać, pakul pryjdzie adkaz.
Paśla pryjšoŭ adkaz na maju skarhu, što ŭsio nibyta ŭsio było zroblena pa zakonie.
I 16 kastryčnika ŭ sudzie mnie dali štraf 35 bazavych za toj čyrvona-zialony ściah. Ja vinu nie pryznavaŭ — u čym? Milicyjant-śviedka, toj, jaki papiaredžvaŭ, kazaŭ, što bačyŭ bieł-čyrvona-biełyja ściahi, čuŭ łozunhi. Na sudzie ŭklučyli videa, i sam milicyjant pryznaŭ, što pamyliŭsia, a padziei, pra jakija jon kazaŭ, byli ŭ inšy dzień. Ale sudździa vyrašyŭ, što ja vinavaty ŭsio roŭna».
Kulhaŭčuk atrymaŭ 35 bazavych štrafu (945 rubloŭ).
«Hety prysud budu abskardžvać taksama. Nadzieja pamiraje apošniaj, jak toj kazaŭ. Zdavacca nie treba, budziem sprabavać», — kaža mužčyna.
Kamientary