Ja, jak i mnohija inšyja, vielmi pavažaju Źmitra Daškieviča za jahonuju idejnaść i samaachviarnaść. Ale ŭ toj ža čas liču, što ludziam, jakija zajmajucca hramadska-palityčnaj dziejnaściu, nie treba štučna padhaniać pad ułasnyja idei rečaisnaść. Bo jana za heta pomścić.
Jak by ni stavicca da Babaryki, fakt toje, što mienavita jahonaje vyłučeńnie ŭ prezidenty viasnoj, razam z vyłučeńniem Cichanoŭskaha i Capkały, stałasia tym pieršym kamieńčykam, što zrušyŭ łavinu, jakuju karniki nie mohuć utajmavać da hetaj pary.
Čytajcie taksama: Daškievič pra Babaryku: Jon nie moh być lidaram dla socień tysiač čałaviek, jakija vyjšli i ŭźniali bieł-čyrvona-bieły ściah
I toje, kolki ludziej z chodu zapisałasia ŭ jahonuju inicyjatyŭnuju hrupu, i toje, kolki taja hrupa sabrała podpisaŭ, i
roznyja inšyja šmatlikija fakty i fakciki absalutna adnaznačna śviedčać pra toje, što hety čałaviek mieŭ vialikuju papularnaść — vidać, značna bolšuju za ŭsich inšych pretendentaŭ.
Padabajecca heta nam ci nie padabajecca. I tyja ludzi, jakija na jaho pracavali i jakija za jaho źbiralisia hałasavać (dy naŭrad ci kardynalna źmianili svaje simpatyi i ciapier), siońnia chodziać pad bieł-čyrvona-biełymi ściahami. Ź jakimi im jašče chadzić — z aŭtazačnymi?
Uvohule, pa-mojmu, vialikaja manipulacyja pradstaŭlać Babaryku i jahonuju kamandu jak ledź nie lutych vorahaŭ bieł-čyrvona-biełaha ściaha, jakija ciapier zubami skryhočuć i vałasy na sabie rvuć, bačačy jahonuju papularnaść.
Nakolki ja pamiataju, nikoli z vusnaŭ Babaryki i jahonaha najbližejšaha atačeńnia nie hučała na adras BČB nijakaha niehatyvu. Inšaja sprava — što vidavočna ŭ pačatku vybarčaj kampanii była ŭstanoŭka na pytańni simvoliki (jak i na pytańni movy) nie zacyklivacca, pa mahčymaści jaho abychodzić abo vykazvacca abciakalna. Što i rabiłasia. Bo ličyłasia, što dla asnoŭnaj masy nasielnictva heta nie pryncypova i nie cikava, a robiačy akcent na hetym chutčej šmat kaho adviernieš, čym pryciahnieš. Na praktycy ž akazałasia, što nijakaj prablemy ŭ vyniku nie ŭźnikła, jaje pierabolšvali. I dumaju, usie hetamu tolki radyja.
Nie sumniavajusia, što i Babaryku sustrakać z turmy buduć pad bieł-čyrvona-biełymi ściahami, i sam jon achvotna i niazmušana pad hety ściah stanie. Biez usialakich unutranych zhryzot.
Ciapier čytajuć
Chrysta Hrozieŭ: ad ramantyka-radyjoamatara da čałavieka, jaki vykryŭ samyja zmročnyja tajamnicy HRU i FSB. Jak jaho vierbavała śpiecsłužba Luksiemburha i jak jon vymušany chavacca ciapier
Kamientary