Łukašenka na rynku padyšoŭ da pakupnikoŭ — adzin ź ich akazaŭsia viadomym miljanieram
Alaksandr Łukašenka siońnia naviedvaŭ fiermierski rynak u Valarjanava. Tam jon pravioŭ paŭtary hadziny. Akramia taho, što abmiarkoŭvaŭ pytańni kantrolu za rynkam, taksama jon kuplaŭ śpiecyi dla płovu i padychodziŭ da pakupnikoŭ. «Prezident na rynku sustreŭ susieda», — napisaŭ telehram-kanał «Puł pieršaha» i apublikavaŭ karotkaje videa. «Susiedam» akazaŭsia viadomy miljanier Mikałaj Burnos, piša Onliner.by.
— Dobry dzień! — Łukašenka kiŭnuŭ adnamu z pakupnikoŭ.
— Vitaju! — adkazaŭ mužčyna.
— Što vy kupili?
— Dy ja ŭsio nabraŭ. Arechi, — achvotna pakazaŭ źmieściva pakieta pakupnik.
— A heta ryba?
— Ryba, miasa.
— Śvinina? Šašłyk budzie. A dzie žyvieš? — spytaŭ Łukašenka.
— Alaksandr Ryhoravič, vioska Kletnaje, Biełaviežskaja pušča.
— A-a-a, nu zrazumieła, susied, značyć.
Uradženiec vioski Kletnaje Mikałaj Burnos — viadomy picierski biznesoviec, uładalnik AAT «Palimierbudmateryjały». Minčukam heta proźvišča znajoma pa sumnaviadomym domie-daŭhabudzie ŭ «Lebiadzinym». U 2011 hodzie Burnos vystupiŭ inviestaram haścinična-žyłoha kompleksu nasuprać «Minsk-Areny», mieŭ namier ukłaści ŭ budoŭlu $120 młn. Zatym niešta pajšło nie tak, i praz paru hadoŭ vyjšaŭ z prajekta, pieradaŭšy jaho inšamu zabudoŭščyku.
Ale bolš za ŭsio Burnos prasłaviŭsia tym, što vyrašyŭ vyratavać ad vymirańnia svaju małuju radzimu. Tuju samuju viosku Kletnaje, što niedaloka ad Biełaviežskaj puščy. Burnos ukłaŭ u rodnuju viosku kala $20 młn. Pobač z baćkoŭskim domam pabudavaŭ dvuchpaviarchovy katedž z mansardaj. Vykapaŭ i zarybiŭ vadajom, adkryŭ spartyŭny centr, turystyčny kompleks z haściavymi domikami, restaranam i łaźniaj, zavioŭ sučasnyja stajni. Starańniami Burnosa ŭ Kletnym źjavilisia pryrodny haz, telefonnaja linija, vodapravod, kanalizacyja i tratuarnaja plitka.
Kamientary