Śviatłana Aleksijevič ŭznaharodžana adnoj z vyšejšych uznaharod Hiermanii
Biełaruskaja piśmieńnica ŭznaharodžana ordenam «Za zasłuhi pierad Fiederatyŭnaj Respublikaj Hiermanijaj». Vialiki kryž 1-j stupieni jana atrymała z ruk prezidenta FRH Franka-Valtera Štajnmajera. Uračystaja cyrymonija prajšła ŭ aŭtorak, 15 červienia, u Bierlinie, u pałacy Bielviu — aficyjnaj rezidencyi kiraŭnika dziaržavy, paviedamlaje Deutsche Welle.
Orden byŭ zasnavany ŭ FRH u pačatku 1950-ch. Adnu z vyšejšych uznaharod Hiermanii ŭručaje fiederalny prezident.
U 2014 hodzie Śviatłana Aleksijevič atrymała Aficerski orden Mastactvaŭ i litaratury — viedamasnuju ŭznaharodu Francyi, a hodam paźniej stała łaŭreatkaj Nobieleŭskaj premii pa litaratury.
Štajnmajer u svajoj pramovie zakranuŭ šmatmiesiačnyja pratesty u Biełarusi. «Žanočy tvar — u hetaha mirnaha, advažnaha i ŭsio jašče žorstka pryhłušanaha imknieńnia da budučyni», — padkreśliŭ kiraŭnik dziaržavy.
Aleksijevič u pramovie ŭ adkaz adznačyła, što «kamunizm jašče nie miortvy i hatovy dać apošni boj», miarkujučy pa padziejach va Ukrainie, Biełarusi i Rasii. Hety ład «žyvie nie tolki ŭ hałovach Pucina ci Łukašenki», i z hetym, «niahledziačy na naš idealizm, treba ličycca», dadała jana.
Piśmieńnica nazvała ciapierašniuju epochu «biasčaśsiem». «Tolki ŭ dvaccatym hodzie my atreślisia ad hetaha snu», — adznačyła Aleksijevič. Jana asabliva vyłučyła nieabchodnaść pracavać z tymi biełarusami, chto ŭsio jašče padtrymlivaje ŭładu. «Treba tłumačyć, što my stali nacyjaj», — skazała piśmieńnica.
Budučaja kniha Aleksijevič — pra biełaruskija pratesty.
Kamientary