«Śvieta, ja vas kachaju». Žychara vioski Kuršynovičy asudzili za čyrvona-biełyja nadpisy i pryznańnie ŭ kachańni Śviatłanie Cichanoŭskaj
6 śniežnia ŭ sudzie Lachavičaŭ vinavatym u ździajśnieńni złačynstvaŭ pavodle č. 1 i č. 2 art. 339 KK RB («Chulihanstva») pryznali 47-hadovaha žychara Lachavickaha rajona Alaksandra Pleskaceviča. U SIZA mužčyna znachodziŭsia z 18 vieraśnia, paviedamlajuć pravaabaroncy.
Sudovaje pasiadžeńnie viała sudździa Natalla Budnik. Pavodle materyjałaŭ spravy, «z 1 pa 28 žniŭnia 2021 hoda Alaksandr Pleskacevič nanios u vioscy Kuršynovičy Lachavickaha rajona nadpisy i malunki biełaha i čyrvonaha koleraŭ na apory linij elektrapieradač, elektryčny ščytok i ścianu budynka Kuršynovickaha fielčarska-akušerskaha punkta. Paśla hetaha abvinavačany, dziejničajučy z vyklučnym cynizmam, nanios bieł-čyrvona-biełyja malunki na try draŭlanyja kryžy, pastaŭlenyja la darohi na ŭjeździe ŭ viosku, čym źniavažyŭ chryścijanskija simvały».
Taksama mužčynu abvinavacili ŭ tym, što «z 8 pa 18 vieraśnia 2021 hoda ŭ tym ža nasielenym punkcie z chulihanskich pamknieńniaŭ padsudny nanios nadpisy i malunki farbaj biełaha i čyrvonaha koleraŭ jašče na 13 apor linij elektrapieradač i elektryčny ščytok». Taksama bok abvinavačvańnia paviedamiŭ sudu, što naniesienuju svaimi dziejańniami škodu RUP «Brestenierha» padsudny nie kampiensavaŭ.
Takim čynam, Alaksandra Pleskaceviča vinavaciać u tym, što jon dvojčy zrabiŭ adno i toje ž — rasfarboŭvaŭ biełaj i čyrvonaj farbaj chaty, słupy i budynki ŭ svajoj ža vioscy.
Pra padsudnaha viadoma, što jon žyvie ŭ vioscy Kuršynovičy ŭ chacie pamierłaj mamy, aficyjna biespracoŭny, ale padpracoŭvaje ŭ pryvatnika — narychtoŭvaje drovy.
Na niekalkich pasiadžeńniach suda, padčas jakich razhladałasia sprava Alaksandra Pleskaceviča, padsudny svaju vinu nie pryznavaŭ:
«Mnie skazali, što ja pafarbavaŭ farbaj słupy. Ale ja ničoha nie rabiŭ, ničoha nie farbavaŭ».
«Vy sami słupy ź bieła-čyrvonaj farbaj bačyli?» — udakładniŭ bok abvinavačvańnia.
«Ja nie ŭhladaŭsia. Bieły koler bačyŭ, čyrvony nie bačyŭ».
Pavodle abvinavačanaha, dva z čatyroch pratakołaŭ apytańnia jon navat nie čytaŭ.
6 śniežnia sud Lachavičaŭ pryznaŭ Alaksandra Pleskaceviča vinavatym u ździajśnieńni złačynstvaŭ pavodle č. 1 i č. 2 artykuła 339 KK RB («Chulihanstva») i asudziŭ jaho da 2 hadoŭ «chimii», pastanaviŭšy viarnuć padsudnamu majku, spartyŭnyja štany i humavyja boty. Blašanku farby i pendźli źniščyć, a pracesualnyja vydatki i škodu «Brestenierha» ŭ pamiery 78 rubloŭ i 78 kapiejek kampiensavać.
Ciapier čytajuć
Žonka ahienta-kachanka Anžaliki Mielnikavaj źviazanaja z arhanizacyjaj Ruskaja madel efiektyŭnaha spakušeńnia14
Kamientary