U Babrujsku zahinuŭ vajskoviec-kantraktnik, jon trapiŭ pad ciahnik
Pra toje, što ŭ ich horadzie 12 lipienia chavali vajskoŭca, vydańniu «Zierkało» raskazali niekalki čytačoŭ z Chojnikaŭ. Jany źviarnuli ŭvahu, što pachavańnie prachodziła ŭviečary, u 19.30, a pracesiju supravadžali vajskoŭcy.
Viersii taho, što zdaryłasia, u žycharoŭ adroźnivajucca: niechta kazaŭ, što chavali sałdata terminovaj słužby, jakoha znajšli na čyhuncy z ahniastrelnymi ranieńniami, niechta — što vajskoviec trapiŭ pad ciahnik.
Pa infarmacyi, jakuju daviedałasia «Zierkało», zahinułaha zvali Valeryj Kałychan, jamu 21 hod. Chłopiec słužyŭ suviazistam u Babrujsku. Jak usio dakładna zdaryłasia, u siamji nie viedajuć. Pa słovach svajaka Valeryja, ciapier idzie rasśledavańnie:
«Viedaju tolki, što ŭsio zdaryłasia ŭ niepracoŭny čas. Jany ŭ toj dzień ź siabrami adpačyvali, smažyli šašłyki. Jon nie piŭ, tamu što byŭ za rulom. I niejkim čynam Valera apynuŭsia ŭ inšaj častcy horada i trapiŭ pad ciahnik. Ciapier idzie rasśledavańnie».
Mužčyna staŭ słužyć u pałku suviazi pa kantrakcie zusim niadaŭna: u mai, paśla taho jak skončyłasia jahonaja terminovaja słužba. Da hetaha Valeryj skončyŭ Paleski dziaržaŭny ahrarny kaledž u Kalinkavičach pa śpiecyjalnaści «techničnaje zabieśpiačeńnie pracesu sielskahaspadarčaj vytvorčaści».
«Nie skazać, kab jon maryŭ pra vojska. Zastavacca pa kantrakcie vyrašyŭ amal praz hod słužby, — tłumačyć svajak zahinułaha. — Zastaŭsia ŭ toj ža čaści, dzie i słužyŭ. Jamu tam vielmi padabałasia. Kali jon słužyŭ, terminovaj słužby było niašmat, usie družna žyli. Vielmi časta jon sustrakaŭsia z kalehami».
Surazmoŭca ličyć, što Valeryj nie moh sam kinucca pad ciahnik. Kaža, u jaho prosta nie było na heta pryčyn:
«Jon chacieŭ žyć. Maryŭ kupić mašynu, da hetaha raspaviadaŭ, jak nabyŭ płazmu. Maci i baćku vielmi dapamahaŭ: u ich šmatdzietnaja siamja — čaćviora dziaciej. Jon naohuł vielmi dobry i pazityŭny. Niezadoŭha da taho, što zdaryłasia, jon znachodziŭsia ŭ adpačynku ŭ Chojnikach, my ź im sustrakalisia, hulali — nijakich prablem nie zaŭvažyŭ. U jaho byli płany, źbiralisia ŭ viosku pajechać adpačyć…»
Apieratyŭnych kamientaroŭ z nahody nadzvyčajnaha zdareńnia ŭ Ministerstvie abarony atrymać pakul nie ŭdałosia.
Ciapier čytajuć
«Siadzieŭ užo 50 sutak, zatrymali jaho dziaŭčynu i brata». Sukamiernik raskazaŭ pra radyjoamatara, aryštavanaha za zdradu dziaržavie1
Kamientary