Biełarusy, jakija žyvuć va Ukrainie, źviarnulisia da Zialenskaha ź pietycyjaj
Na sajcie prezidenta Ukrainy źjaviłasia pietycyja, jakaja tyčycca pravavoha statusu biełarusaŭ, jakija lehalna žyli va Ukrainie da pačatku vajny i praciahvajuć znachodzicca ŭ krainie ciapier. Jaje inicyjatary prosiać Uładzimira Zialenskaha likvidavać štučnyja pieraškody, jakija nie dajuć našym suajčyńnikam mahčymaści lehalna žyć i pracavać u ciapierašniaj Ukrainie.
Jany adznačajuć, što z pačatku vajny ŭkrainskaje mihracyjnaje zakanadaŭstva nie źmianiłasia, adnak biełarusam, jakija navat majuć Vidy na žycharstva va Ukrainie, pamiežnyja słužby admaŭlajuć va ŭjeździe ŭ krainu. Tyja, chto znachodzicca va Ukrainie, nie mohuć padoŭžyć svoj lehalny status. Mihracyjnaja słužba taksama masava admaŭlaje biełarusam, jakija žadajuć astalavacca va Ukrainie.
U pietycyi padkreślivajecca, što mnohija biełarusaŭ, jakija musili astalavacca va Ukrainie, nie tolki nie źjaŭlajucca jaje vorahami, ale, naadvarot, znajšli tut prytułak ad pahrozy na radzimie:
«Tyja z nas, chto śviadoma abraŭ demakratyju i adstojvańnie čałaviečych kaštoŭnaściaŭ zamiest aŭtarytaryzmu ŭ našaj krainie, chto źviazaŭ svaju budučyniu ź jeŭrapiejskaj Ukrainaj — pavinny być padtrymanyja i zaachvočanyja, a zamiest hetaha sutykajucca z dadatkovymi vyklikami i baraćboj ź biurakratyzmam».
«My nie prosim dadatkovych prefierencyj, nie stvarajem nijakich prablem, zaŭsiody hatovyja da supracoŭnictva z uładaj, spryjajem adnaŭleńniu i stanaŭleńniu niezaležnaj, demakratyčnaj i mocnaj krainy. Adzinaje, čaho my prosim, — nie pieraškadžać nam znachodzicca na terytoryi i ŭzajemadziejničać ź dziaržavaj i hramadzianami Ukrainy, nie atajasamlivajučy ŭsich biełarusaŭ ź ciapierašniaj nielehitymnaj uładaj našaj krainy», — adznačajuć padpisanty.
Kab Uładzimir Zialenski razhledzieŭ pietycyju, jana pavinna nabrać 25 tysiač hałasoŭ.
Kamientary