Ursuła fon der Lajen: «Stol cenaŭ» na rasijskuju naftu budzie ŭ vośmym pakiecie sankcyj
Jeŭrasajuz abviaściŭ pra padrychtoŭku vośmaha pakieta sankcyj suprać Rasii. Pra heta siońnia zajaviła staršynia Jeŭrakamisii Ursuła fon der Lajen.
Pavodle fon der Lajen, pakiet budzie ŭklučać nastupnyja sankcyi:
- novyja zabarony na impart rasijskaj pradukcyi, što pazbavić rasijskuju ekanomiku dachodaŭ u 7 miljardaŭ jeŭra;
- budzie ŭviedziena «stol cenaŭ» na rasijskuju naftu;
- suprać asob, jakija buduć abychodzić sankcyi, buduć taksama ŭvodzicca sankcyi;
- jeŭrapiejcam zabaroniać uznačalvać rasijskija kampanii
- pavialičycca śpis zabaronienych da pastaŭki ŭ RF tavaraŭ u śfiery avija— i elektronnych kampanientaŭ, chimičnych rečyvaŭ.
Stol cenaŭ na rasijskuju naftu — heta raniej nie aprabavanaja miera, raspracavanaja ZŠA paśla pačatku vajny. U teoryi jana pieratvoryć viadučyja industryjalnyja krainy Zachadu ŭ kartel pakupnikoŭ, jaki naviazvaje Rasii maksimalnuju canu, jakuju jany hatovyja płacić za jaje naftu. Canu prapanujecca ŭstalavać prykmietna nižejšuju za biahučuju rynkavuju, ale vyšejšuju za sabiekošt zdabyčy ŭ Rasii, z tym kab zachavać pastaŭki paliva na suśvietny rynak, ale pry hetym prykmietna źnizić prytok naftadalaraŭ u rasijski biudžet. Na praktycy pośpiech hetaj schiemy zaležyć ad kolkaści krain, jakija dałučylisia da jaje; akramia taho, niezrazumieła, nakolki efiektyŭna hetaja miera budzie vykonvacca. Ale sprabavać varta, i z vykazvańniaŭ fon der Lajen možna zrazumieć, što jana ŭžo ŭ pryncypie ŭzhodnienaja.
Novyja sankcyi źbirajucca ŭvieści ŭ suviazi z tak zvanymi «refierendumami», jakija Rasija praviała na akupavanych terytoryjach Ukrainy. Kiraŭnica Jeŭrakamisii nazvała ich sfalsikavanymi i paviedamiła, što heta sproby niezakonnym čynam adchapić ziemli Ukrainy.
Sankcyi ž, pavodle jaje, «kuślivyja», fon der Lajen padkreśliła: «My poŭnyja rašučaści prymusić Kreml zapłacić za hetuju dalejšuju eskałacyju».
Ciapier čytajuć
Apakalipsis zaŭtra. Statkievič napisaŭ pieršy artykuł — z papiaredžańniem pra niebiaśpieku z boku Rasii55
Kamientary