Suśvietny lidar pa čypach zhortvaje svaje kampaniju ŭ Minsku z-za sankcyj

Praca kampanii abmiežavanaja praz sankcyi, kamandu rełakujuć u Polšču. Tych, chto admovicca ad pierajezdu, mohuć zvolnić. Pra heta dev.by na ŭmovach ananimnaści raspaviali niekalki supracoŭnikaŭ SK hynix memory solutions Eastern Europe (da 2018 hoda — Softeq Flash Solutions). 

Da vajny va Ukrainie ŭ minskim ofisie SK Hynix pracavała bolš za 200 čałaviek. Kolkaść kamandy, jakaja ciapier znachodzicca ŭ Biełarusi, nieviadomaja.

— Ź leta ŭ Polšču rełakavałasia blizu 100 čałaviek. Častka supracoŭnikaŭ syšła ŭ inšyja kampanii, choć ciakučki SK Hynix raniej nikoli nie było, pakolki ŭmovy ŭ Biełarusi pa zarpłacie byli vyšej za rynak. Niekatoryja stamilisia ad adsutnaści krutych prajektaŭ. Z-za sankcyj z boku ZŠA i Paŭdniovaj Karei ŭ nas całkam adsutničała kamunikacyja i dostup da resursaŭ i siervieraŭ, raźmieščanych u Minsku. Navat licenzii na roznyja IDE i tuły nielha było nabyvać dla minskaha ofisa. Chtości syšoŭ z-za niavyznačanaści, — raspaviadajuć supracoŭniki.

Pieršapačatkova mierkavałasia, što astatnija śpiecyjalisty buduć pracavać na ŭnutranych prajektach. Potym, pa słovach surazmoŭcaŭ, kancepcyja źmianiłasia. Kampanija paviedamiła, što tych, chto admovicca rełakavacca ŭ Polšču biez surjoznaj pryčyny (nieraźviazanyja pytańni z vajenkamatam, chvaroba, nie dali vizu i h. d.), zvolniać, albo takim śpiecyjalistam pahoršać umovy — źniziać zarobak, abaviažuć chadzić u ofis. Rašeńnie treba było pryniać da kanca listapada.

— U 2023 hodzie minski ofis źbirajucca zakryć. Pakul jon pracuje, ale arendnyja płoščy skaracili. U štacie jość inžyniery, praŭda, jany nie pracujuć nad dobrymi i śviežymi prajektami. Zastałasia prykładna pałova kamandy, novych śpiecyjalistaŭ nie najmajuć, — kaža surazmoŭca.

Jašče viasnoj kampanija ahučyła supracoŭnikam płany pa rełakacyi ŭ Hdańsk i pracaŭładkavańni ŭ inšuju kampaniju — Solidigm. Heta daččynaja struktura SK Hynix, jakaja była stvorana ŭ vyniku ździełki z Intel.

Košt rełakacyi adnaho supracoŭnika aceńvajecca ŭ sumu da 35 tysiač dalaraŭ (ličbu ahučyli try śpikiery), u jakuju ŭvachodzić:

— 4 tysiačy dalaraŭ — rełakiejt-bonus;

— 10 tysiač dalaraŭ — na pieravozku rečaŭ;

— košt pasłuhi pa pošuku pastajannaj kvatery (da 4 dzion pracy ryełtara);

— košt arendy časovaha žylla da 60 dzion;

— dapamoha ŭ padačy padatkovaj dekłaracyi za 2022 hod.

Na ruki ty atrymlivaješ 14 tysiač dalaraŭ (bonus+hrošy na pieravozku rečaŭ), a astatnija pasłuhi vykonvajuć padradčyki, kažuć ludzi.

• 13
• 0
• 1
• 1
• 2
• 2
• 1
• 0