U Minsku, u adroźnieńnie ad rehijonaŭ, padaje siaredni zarobak. Takuju statystyku pryvodzić Biełstat. Što moža być pryčynaj takoha paradoksu?
Pryrost u rehijonach
Siaredni naminalny naličany zarobak u lutym skłaŭ 1687,8 rubla. Jon vyras u paraŭnańni ź minułym hodam — tady naličanaja siaredniaja zarpłata ŭ lutym składała 1563 rubli.
Ale, zhodna sa statystykaj, zarobki ŭ stalicy padajuć. U lutym 2022 hoda minčukam u siarednim naličvałasia 2410 rubloŭ. Praz hod hety pakazčyk skłaŭ 2335,2 rubla.
Rehijony ŭ toj ža čas pakazali pryrost: naprykład, u Minskaj vobłaści hod nazad siaredni naličany zarobak vyras z 1475 da 1677 rubloŭ. Vyras jon i ŭ Mahiloŭskaj vobłaści — samym biednym rehijonie krainy. U lutym 2023 hoda jon skłaŭ 1386 rubloŭ suprać 1219,3 rubla hodam raniej.
Realny zarobak u lutym u rehijonach taksama vyras u paraŭnańni sa statystykaj hod tamu. U Minsku ž jon za hod upaŭ na 13,2%.
Čamu tak adbyvajecca?
Vyhladaje, što asnoŭnaja pryčyna takich paradoksaŭ kryjecca ŭ tym, što mienavita ŭ Minsku była skancentravana najbolšaja kolkaść IT-kampanij. Letaś IT-halina skaraciłasia nastolki, što ŭpieršyniu ŭniesła admoŭny ŭniosak u VUP (-0,2%). Dziasiatki kampanij rełakavali svoj biznes razam sa značnaj častkaj supracoŭnikaŭ u inšyja krainy. Za 2022-hi kolkaść ajcišnikaŭ u krainie źmienšyłasia na 16 tysiač.
Praz adtok śpiecyjalistaŭ u ekanomicy rezka skaraciłasia kolkaść śpiecyjalistaŭ z zarobkam 10 000 rubloŭ i bolš.
Pa danych apytańniaŭ, praviedzienych partałam dev.by, siaredni zarobak biełaruskich ajcišnikaŭ składaje 2335 dalaraŭ, miedyjanny — 1800 dalaraŭ.
Raniej IT-śfiera ličyłasia drajvieram biełaruskaj ekanomiki, jaki nie tolki sam pa sabie dadavaŭ pryrost VUP, ale i ciahnuŭ za saboj inšyja haliny, takija, jak kamiercyjnaja nieruchomaść i śfiera pasłuh.
Niahledziačy na adtok rabotnikaŭ, łukašenkaŭcy praciahvajuć kašmaryć ajcišnikaŭ, u tym liku za danaty, zroblenyja jašče ŭ 2020—2021 hadach. U toj ža čas kampanii ź biełaruskimi karaniami ŭžo paśpieli ŭvajści ŭ top padatkapłacielščykaŭ u Litvie.
Ab tym, što Minsk bolš za rehijony pakutuje ad sankcyj u cełym i skaračeńnia IT-siektara ŭ pryvatnaści, śviedčać i inšyja pakazčyki. Naprykład, letaś nazirałasia situacyja, kali ceny na nieruchomaść u rehijonach raśli, a ŭ stalicy — nie.
Jak za 10 hadoŭ źmianilisia zarobki ŭ Biełarusi, Polščy i Litvie. Ličby susiedziaŭ uražvajuć
Ciapier čytajuć
Pasadzili padpałkoŭnika i byłoha vykładčyka Vajskovaj akademii. Jon padtrymaŭ narod u 2020-m3
Kamientary