A ŭ śniežni ŭ Biełarusi čakajuć bolš mahutnuju chvalu epidemii hrypu.
Niahledziačy na toje, što Ministerstva achovy zdaroŭja Biełarusi kanstatuje źnižeńnie zachvorvańnia na hryp, sumnaja statystyka ŭ susiedniaj Ukrainie naściarožvaje. U śniežni ŭ Biełarusi čakajuć pastupleńnie vakcyny suprać hrypu A/H1N1 i abiacajuć novuju chvalu siezonnaha rostu zachvorvańnia.
Ministerstva achovy zdaroŭja Biełarusi adznačaje źnižeńnie zachvorvańnia na vostryja reśpiratornyja virusnyja infiekcyi ŭ krainie. Pavodle aficyjnaj infarmacyi, za minuły tydzień kolkaść zvarotaŭ z pryčyny VRVI źniziłasia na 50,7%. Što da śvinoha hrypu, to na dadzieny momant zarehistravana 165 vypadkaŭ zachvorvańnia na virus AH1N1.
Praŭda, statystyka va Ukrainie vyhladaje kudy bolš sumnaj. Jak paviedamlaje Ministerstva achovy zdaroŭja Ukrainy, z vostrymi reśpiratornymi zachvorvańniami z pačatku epidemii (29 kastryčnika) sutyknulisia 1.364.939 čałaviek. Kolkaść pamierłych užo dasiahnuła 300 čałaviek.
Miž tym ajčynnym rabotnikam śfiery achovy zdaroŭja pakul ŭdajecca zachavać chacia b bačny spakoj.
Praŭda, daktary ŭsio ž prahnazujuć u śniežni bolš mahutnuju epidemiju hrypu.
Razam z tym u troch škołach Minska epidemijołahi ŭžo prypynili zaniatki z‑za VRVI i hrypu. Budynki hetych navučalnych ustanoŭ apracoŭvajuć diezinfikujučymi srodkami, paviedamili Interfax.by ŭ Ministerstvie achovy zdaroŭja.
Usiaho ž u Biełarusi kanikuły z‑za VRVI i hrypu byli praciahnutyja ŭ 1243 ustanovach adukacyi, adnoŭlenyja zaniatki ŭ 972 ustanovach.
‑‑ U bližejšyja dni Ministerstva achovy zdaroŭja maje namier abjavić tender na nabyćcio vakcyny suprać hrypu A/H1N1. My raźličvajem, što vakcyna pastupić u krainu ŭ kancy listapada — pačatku śniežnia, ‑‑ paviedamiła www.interfax.by hałoŭny epidemijołah Ministerstva achovy zdaroŭja Biełarusi Ina Karaban.
Pa jaje słovach, «vakcyna suprać śvinoha hrypu moža być z Rasii, Francyi. Hiermanii, Vialikabrytanii». Epidemijołah taksama paviedamiła , što «ad siezonnaha hrypu ŭ Biełarusi sioleta pryščeplena ŭžo bolš za 948 tys. čałaviek», a ad pandemičnaha hrypu płanujecca pryščapić jašče bolš. U pieršuju čarhu heta tyčycca miedycynskich rabotnikaŭ, a taksama «supracoŭnikaŭ tak zvanych žyćciova važnych słužbaŭ, jakija adkazvajuć za śviatło, haz i hetak dalej».
Taksama stała viadoma, što Suśvietnaja arhanizacyja achovy zdaroŭja pastaviła ŭ Biełaruś kala 60 tysiač upakovak «Tamiflu» u jakaści humanitarnaj dapamohi, paviedamlaje «Jeŭraradyjo». Pavodle słovaŭ kaardynatara prahram biełaruskaha biuro SAAZ Viery Iljankovaj, humanitarnaja dapamoha adrazu budzie nakiroŭvacca ŭ balnicy, adpaviedna, u aptekach jaho šukać nie varta. Da taho ž SAAZ zapeŭnivaje, što ŭžyvańnie «Tamiflu» zdarovymi ludźmi virus nie spyniaje, vykarystoŭvacca leki pavinny tolki chvorymi.
Kamientary