7-hadovaja ŭkrainskaja himnastka, jakoj adarvała nahu rasijskaj rakietaj, vyjhrała pieršy turnir
Maleńkaja ŭkrainskaja spartoŭka Alaksandra Paskal zavajavała pieršaje miesca na svaich pieršych spabornictvach pa mastackaj himnastycy. 7-hadovaja ŭradženka Čarnamorska straciła letaś nahu.
«Ja hladzieła i nie mahła pavieryć, jak chutka jana reabilitavałasia! A samaje hałoŭnaje, jakaja matyvacyja mahutnaja pavinna być u 7-hadovaj dziaŭčynki, kab tak reaktyŭna viarnucca ŭ mastackuju himnastyku z pratezam nahi!» — napisała ŭ siabie ŭ fejsbuku ŭpaŭnavažanaja prezidenta Ukrainy pa pravach dziciaci i dziciačaj reabilitacyi Darja Hierasimčuk.
16 maja 2022 hoda rasijskija akupacyjnyja vojski zapuścili rakietu pa bazie adpačynku ŭ Biełharad-Dniastroŭskim rajonie (Zatoka), jak piša Obozrevatel.
Paciarpieli 4 čałavieki, ale najbolš surjoznyja traŭmy atrymała Saša. Jak raskazaŭ paźniej jaje dziadula, udar zdaryŭsia a 9-j hadzinie ranicy, kali ŭ domie znachodziłasia ŭsia siamja.
U vyniku terarystyčnaj ataki 6-hadovaja dziaŭčynka atrymała adkryty pierałom ruki, traŭmu hałavy, pierałom 4 rebraŭ, množnyja askiepkavyja ranieńni. Plita pierakryćcia ŭpała joj na nahu, razdrabniŭšy ŭsie kostki. Paciarpieła i maci Alaksandry, Maryja Paskal.
Daktary trymali junuju spartsmienku 15 dzion u miedykamientoznaj komie, ale vyratavać kaniečnaść nie zmahli.
Paśla mnohich miesiacaŭ lačeńnia va Ukrainie Alaksandra letaś pabyvała na reabilitacyi ŭ Aŭstryi.
Joj zrabili apieracyju na ruce, ustaviŭšy śpiecyjalnyja śpicy, jakija znachodziacca tam da hetaha času. Taksama ŭ Aŭstryi jana atrymała pratez, na jakim 4 miesiacy vučyłasia chadzić.
Pa pryjeździe va Ukrainu Saša adrazu pajšła na zaniatki pa mastackaj himnastycy.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj29
Kamientary