«Danieści infarmacyju dla ludziej», «prapanavać svaje prahramy j kandydatury» – heta zamała dla sytuacyi aŭtarytarnaje letarhii. Padobnaja taktyka jość biurakratyčnaj padtrymkaj isnaha statusu: toje, što pracuje ŭ demakratyčnych krainach, stałasia ździekam u našych umovach.
Demakratyčnyja siły iznoŭ rychtujucca da čužoj hulni. Miascovyja vybary, jakija nieŭzabavie abvieścić režym, razhladajucca apazycyjaj jak srodak dahrukacca da narodu j nat vyłučyć svaich deputataŭ.
Ale vybaraŭ u Biełarusi ŭžo niama. Administracyjnaja systema kantrolu j falšavańniaŭ adładžanaja sa zhrabnaściu biurakratyčnaha biezmazhoŭja, žyvyja hałasy dušacca, dyj ich nichto nie padličvaje. U hetych umovach čužaja hulnia pa čužych praviłoch tolki vypuskaje paru, uzakońvaje režym i spryjaje hramadzkaj apatyi.
«Danieści infarmacyju dla ludziej», «prapanavać svaje prahramy j kandydatury» – heta zamała dla sytuacyi aŭtarytarnaje letarhii. Padobnaja taktyka jość biurakratyčnaj padtrymkaj isnaha statusu: toje, što pracuje ŭ demakratyčnych krainach, stałasia ździekam u našych umovach.
Nieabchodny asymetryčny j zrazumieły adkaz, jaki ŭzmacnić hramadzkuju mabilizacyju i dapamoža režymu «uroniťsia». Nieabchodnaja svaja hulnia pa svaich praviłoch. Aficyjoznyja «vybary» – lehalny kanał dla takoj hulni.
Zamiest «infarmavańnia» i «delehactva» – stvareńnie alternatyŭnaha siecińnia hramadzkaj aktyŭnaści. Siecińnie – jašče nie alternatyŭnaja miascovaja ŭłada, ale novaja dyfuznaja mapa siły. Tysiačy łakalnych ruchaŭ, abjadnanych kampanijaj «VIARTAJEM UŁADU NARODU».
Hetaje viartańnie – u patrabavańniach žycharoŭ da svajho ŽESu, u łakalnych akcyjach pa pabudovie novych darohaŭ, u pratestach mieścičaŭ suprać pieranazvanych vulicaŭ i h.d. Kožnaja miascovaja prablema źbirajecca, analizujecca, daśledujecca. Demakratyčnyja siły prapanujuć svajo vyrašeńnia – ekanamičnaje, jurydyčnaje, tvorčaje.
A kampanija «vybaraŭ» – srodak mabilizacyi aktyvistaŭ dla vyrašeńnia łakalnych zadačaŭ i masavaj ataki na miascovym uzroŭni. Partyi, hramadzkija ruchi dyj asobnyja palityki – maderatary j apiekuny siecińnia, jakoje zdolnaje prymać rašeńnie j biaź ich.
Paśla płoščy Kalinoŭskaha ŭ Internecie źjaviŭsia voklič: «Dastaniem ich! My – hramadzianie! Ułada naležyć nam!»
Režym zdolny źniščać apazycyjnyja centry, źniavolvać palitykaŭ, ale jon ničoha nia zdolny zrabić suprać dyfuznaje j masavaje ataki. Što zrobić režym suprać pratestaŭ žycharoŭ domu, jakija damahajucca ramontu? A telefanavańni, kab spynili tranślacyju hidkaściaŭ na BT? Masavyja listy ŭ instancyi – u padtrymku pradprymalnikaŭ?
Režym moža praihnaravać łakalny supraciŭ źnizu – ale tvorčaja inicyjatyva ŭ vyrašeńni prablemaŭ pierachodzić da niefarmalnych lideraŭ. Režym biurakratyčny – i musić reahavać hruvastka, tonami papieraŭ. Masavyja prapanovy ad mieścičaŭ mohuć vyklikać paraluš systemy, albo, u asobnych vypadkach, aficyjoz musić prymać alternatyŭnyja prapanovy.
U lubym vypadku inicyjatyva pierachodzić da hramadztva – decentravanaha, niepadkantrolnaha, usiudyisnaha. Hramadztvu nieabchodnyja pieramohi, kab spynić apatyju – i ŭzmacnić svaje siły. Takija pieramohi całkam dasiahalnyja na łakalnym uzroŭni.
Kampanija miascovych vybaraŭ – srodak prajavić aktyŭnaje siecińnie, rekrutavać novych dobraachvotnikaŭ. Heta svaja hulnia pa svaich praviłoch. «DASTANIEM ICH!» Viartajem uładu narodu.
Andrej Rasinski, nmnby.org
Ciapier čytajuć
Siłaviki pahražajuć komiku Usoviču, jaki pryjechaŭ adpačyć na Narač4
Kamientary