Kali vy padumali, što skufy heta niejki narod, to pamylilisia. Heta adno z novych słenhavych słovaŭ, jakim moładź apisvaje sučasnyja typažy mužčyn.
Niadaŭna my apublikavali zdymak Siarhieja Michałka. Pa im vidać, što śpiavak istotna źmianiŭsia. U kamientarach napisali, što jon «saskufiŭsia». Mahčyma, našym starejšym čytačam takoje słova nieznajomaje.
Słova «skuf», a pobač ź im «ciubik», «čečyk», «masik», «štrych» vykarystoŭvacca ŭ internecie dla apisańnia roznych typaŭ mužčyn. Asabliva hetyja słenhavyja słovy papularnyja ŭ moładzievym asiarodku.
Słova «skuf» pachodzić ad proźvišča rasijskaha błohiera Alaksieja Skufjina, jaki pisaŭ na palityčnyja temy na veb-forumie «Dvač», dzie zachoŭvałasia poŭnaja ananimnaść. Ale praź niekatory čas apanienty błohiera rassakrecili jaho asobu i vykłali jahonyja zdymki.
Proźvišča błohiera, skaročanaje da «skuf», stała chadziačaj nazvaj. Ciapier im zvyčajna nazyvajuć žanatych mužčyn, jakija nie sočać za saboj, nie zajmajucca sportam, šmat času pravodziać za kampjutarnymi hulniami ci ležačy na kanapie i hledziačy televizar.
Skuf — heta typaž z žyvocikam, časta dušniła i zaciaty.
Siarod viadomych asobaŭ u katehoryju skufaŭ trapiŭ akcior Leanarda dzi Kaprya.
Masik
Dla apisańnia mužčyny, jaki maje supraćlehły «skufu» charaktar i vyhlad, vykarystoŭvajuć słova «masik».
«Masik» aznačaje miłaha, empatyčnaha mužčynu, jaki sočyć za svaim vyhladam, zajmajecca sportam, sočyć za svaim unutranym psichičnym stanam, pryjazny ŭ kamunikacyi z žančynami. Ź im pryjemna razmaŭlać. Ličycca, što «masik» zaŭsiody imkniecca znajści kampramis i paźbiehnuć sprečki.
Zvańnia «masik» zasłužyŭ taki knižny i kinošny hieroj, jak Hary Poter.
Čečyk
Słova «čečyk» — skaročanaje ad «čałaviečak» i spačatku było sinanimičnaje takim daŭno viadomym słoŭcam, jak «čuvak» i «čeł». Ale ŭ adroźnieńnie ad ich, słova «čečyk» ciapier vykarystoŭvajuć i dla charaktarystyki adnosin pamiž mužčynaj i žančynaj.
«Čečykam» žančyny nazyvajuć mužčynu, jaki im niecikavy jak mužčyna, nie maje šancaŭ na ŭzajemnaść. Ź im u žančyny tolki siabroŭskija adnosiny, bo «čečyk» nie vyklikaje ŭ jaje nijakich ramantyčnych pačućciaŭ. Pry hetym pra jaho jak čałavieka nielha ničoha drennaha skazać.
Ciubik
Słovam «ciubik» nazyvajuć mužčyn, jakija ź pieršaha pohladu padajucca vielmi pryvabnymi, ale na samoj spravie za miłaj mordaj i abajalnaściu chavajecca manipulatar, jaki imkniecca da daminavańnia i kantrolu, nie curajecca prynizić svaju partniorku. Adnosin z takim čałaviekam lepš paźbiahać.
Typičnym «ciubikam» źjaŭlajecca Kosmas ź filma «Bryhada».
Štrych
Kali «ciubik» vykarystoŭvaje tolki emacyjanalny hvałt, to voś «štrych» nie ličyć haniebnym užyć i fizičny. Taki mužčyna vyznačajecca dastatkova zadzirlivymi pavodzinami i epatažam.
«Štrychami» nazyvajuć taksama ludziej, źviazanych sa śvietam kryminału, ad jakich lepš trymacca jak maha dalej.
Pamior palitviazień Valancin Štermier. «Ledź chadziŭ paśla insultu — a jaho kinuli ŭ ŠIZA»7
Kamientary