U Breście zaŭvažyli dziaciej-kvadrobieraŭ. Što heta za novy trend?
Z kožnym dniom siarod dziaciej i padletkaŭ nabiraje abaroty ruch «kvadrobieraŭ». Sutnaść jaho ŭ tym, što chłopčyki i dziaŭčynki nadziajuć maski žyvioł i kapirujuć ich zvyčki: skačuć, hyrkajuć, vysoŭvajuć jazyk i da t. p. Miarkujučy pa rolikach z sacsietak, «trend» dajšoŭ i da Biełarusi: rolik z Bresta sabraŭ bolš za 1,5 miljona prahladaŭ, zaŭvažyŭ Telegraf.news.
Kvadrobika (ad łac. quattuor — «čatyry» i anhł. aerobics — «aerobika») — heta nieaficyjny vid sportu, u jakim jak dzieci, tak i darosłyja pieramiaščajucca na karačkach, imitujučy ruchi žyvioł. Padčas zaniatkaŭ pryniata vykarystoŭvać maski i nakładnyja chvasty ŭłasnaj vytvorčaści.
Z adnaho boku, heta niaprostaja akrabatyka, padobnaja da ruchaŭ parkurščykaŭ, z druhoha — dziŭnaje zachapleńnie, jakoje moža pieraraści ŭ nieadekvatnyja pavodziny. Tym nie mienš, čaściej za ŭsio kvadrobiery — heta dzieci i padletki 7-14 hadoŭ, dla jakich heta chutčej hulnia, čym spartyŭnaje spabornictva.
Na prastorach sacsietak raz-poraz źjaŭlajucca šmatlikija videa z hetym zachapleńniem. Naprykład, adno ź ich źniali vidavočcy z Bresta: na kadrach vidać, jak dźvie dziaŭčynki ŭ maskach skačuć kala prajeznaj častki.
Miarkujučy z kamientaroŭ, biełarusy novy trend nie acanili. Tak, mnohija pisali, što ŭ ich «ad adnaho pohladu na heta padaje IQ», a inšyja, naadvarot, nie bačyli ŭ hetym ničoha strašnaha, bo «heta ž dzieci».
«Chutčej by jany vyraśli i łavili dziki soram z hetaha etapu ŭ ich žyćci», — napisała pad rolikam adna z karystalnic tyktoku. Inšaja dapoŭniła: «Miljony hadoŭ evalucyi katu pad chvost».
«A kali mašyna sabje, to kaho vyklikać? Doktara ci vieterynara?» — zadała rytaryčnaje pytańnie sa ździekam jašče adna padpisčyca.
«A jany niešta drennaje robiać? Usie dzieci hulajuć u žyvioł, «dočki-maci» i h. d. Heta narmalna», — vykazała alternatyŭny punkt hledžańnia inšaja karystalnica tyktoku.
«Hałoŭnaje, kab nikomu nie naviazvalisia. A ŭvohule liču, na hetym etapie žyćcia jany raźvivajuć svaju fantaziju i vyvučajuć mahčymaści cieła, vydatna ž!» — staŭ na abaronu novaha kirunku chtości z mužčyn u kamientarach.
U svaju čarhu, dziciačy psichijatr Antanina Pierakrostava adznačyła, što ŭ takija hulni, jak praviła, uklučajucca dzieci, jakim nie chapaje ŭvahi i padtrymki z boku baćkoŭ. Zvyčajna ŭ ich nazirajucca prablemy z adnahodkami, tamu chłopcy abjadnoŭvajucca ŭ «zhrai», kab adčuć biaśpieku, značnaść, krutaść.
Adnak, sa słoŭ lekara, kali heta nie pierachodzić miežy, ničoha strašnaha ŭ takich hulniach niama.
«Pabiehać u mascy ŭ parku dziciaci da dzieviaci hadoŭ — całkam narmalna, ale pravodzić u maskach žyvioł volny čas dzieciam starejšaha ŭzrostu, abjadnoŭvajučysia ŭ hrupu, — užo devijacyja. Dobra, kali dzicia pahulaje miesiac-dva i pieraklučycca samo abo z baćkami na bolš karysnyja raźvivajučyja zaniatki», — padkreśliła psichołah.
Taksama jana dadała: kali zachapleńnie robicca naviaźlivym, baćki pavinny źviarnuć uvahu, ci jość u dziciaci mahčymaść vykazać siabie ŭ tvorčaści, palepšyć pośpiechi ŭ vučobie, a taksama abmierkavać ź dziciačym psichołaham mientalny stan svajho dziciaci.
«Hazony čystyja, brech nie razdražniaje». U Minsku vyhulvali sabaku-robata
«Kapiec. Stydoba!» Tyktok parvała videa žančyn kala kavavaha aŭtamata ŭ Baranavičach
Vykonvaje kamandy i lubić «pryčoski». Pad Mahilovam žyvie jahnia, jakoje ličyć siabie sabakam
Dziciačy łahier na Lidčynie zakryli z-za nadpisaŭ pa-anhlijsku i ściažka Hiermanii
Ciapier čytajuć
Pamior palitviazień Valancin Štermier. «Ledź chadziŭ paśla insultu — a jaho kinuli ŭ ŠIZA»7
Kamientary