Rašeńnie, ci treba dazvolić Ukrainie bić pa terytoryi Rasii, nie pryniataje
Pieramovy Bajdena i Starmiera zaviaršylisia.
Brytanski premjer Kir Starmier zajaviŭ, što jaho pieramovy z prezidentam ZŠA Džo Bajdenam nasili stratehičny, a nie taktyčny charaktar, i na ich nie išła havorka «ab niejkim kankretnym rašeńni». Napiaredadni vizitu Starmiera ŭ Vašynhton zachodniaja presa pisała, što jon maje namier pierakanać Bajdena dazvolić Ukrainie vykarystoŭvać pastaŭlenyja Brytanijaj rakiety Storm Shadow dla naniasieńnia ŭdaraŭ pa celach u Rasii, piša Bi-bi-si.
Pa vynikach pieramovaŭ z prezidentam ZŠA Džo Bajdenam u Vašynhtonie premjer-ministr Vialikabrytanii Kir Starmier nie paznačyŭ nijakaha rašeńnia pa pytańni, ci treba dazvolić Ukrainie nanosić udary zachodnimi rakietami pa celach u hłybini terytoryi Rasii.
Na pytańnie, ci ŭdałosia jamu pierakanać Džo Bajdena, Starmier adkazaŭ, što ŭ ich była «doŭhaja i praduktyŭnaja dyskusija pa šerahu kirunkaŭ, uklučajučy, Ukrainu, Blizki Uschod i Inda-Cichaakijanski rehijon».
Pavodle jaho słoŭ, razmova z Bajdenam nasiŭ stratehičny, a nie taktyčny charaktar, i havorka nie išła «ab niejkim kankretnym rašeńni». Pry hetym u samalocie pa šlachu ŭ Vašynhton, adkazvajučy na pytańni žurnalistaŭ, Starmier pryznavaŭ, što ŭ suviazi z «važnymi padziejami jak va Ukrainie, tak i na Blizkim Uschodzie», jakija adbuducca ŭ bližejšy čas, na pieramovach z prezidentam ZŠA «nieabchodna pryniać šerah taktyčnych rašeńniaŭ». «Ja vielmi chaču, kab hetyja taktyčnyja rašeńni prymalisia ŭ stratehičnym kantekście», — kazaŭ jon.
Paśla taho jak hetyja pieramovy zaviaršylisia, a rašeńnie pa pytańni, ci treba dazvolić Ukrainie nanosić udary pa terytoryi Rasii, tak i nie było pryniata, Brytanski premjer zajaviŭ, što razmova budzie praciahnutaja ŭ Hienieralnaj Asamblei AAN praź niekalki dzion z udziełam «bolš šyrokaha koła asob».
Bieły dom pa vynikach pieramovaŭ vypuściŭ łakaničnuju zajavu, u jakoj havorycca, što siarod inšych tem, jakija abmiarkoŭvalisia na sustrečy, lidary «paćvierdzili svaju niepachisnuju padtrymku Ukrainy, jakaja praciahvaje abaraniacca ad rasijskaj ahresii».
Na bryfinhu ŭ piatnicu, napiaredadni pieramovaŭ, pradstaŭnik Rady nacyjanalnaj biaśpieki ZŠA Džon Kirbi zajaviŭ, što Vašynhton nie płanuje ŭnosić nijakich źmienaŭ u abmiežavańni, nakładzienyja na vykarystańnie Ukrainaj zbroi amierykanskaj vytvorčaści dla naniasieńnia ŭdaraŭ pa terytoryi Rasii.
Kamientary