Na Biełaruskaj čyhuncy zatrymali jašče adnaho hramadzianina Japonii
«Supolnaść biełaruskich čyhunačnikaŭ» paviedamlaje, što 1 śniežnia pad Kalinkavičami zatrymali hramadzianina Japonii, jaki nibyta rabiŭ videazdymku abjektaŭ infrastruktury Biełaruskaj čyhunki.
Pavodle źviestkach «Supolnaści biełaruskich čyhunačnikaŭ», zdareńnie adbyłosia ranicaj 1 śniežnia na 8-m pikiecie 407-ha kiłamietra pierahonu Kalinkavičy-Zachodnija — raźjezd Klinsk. Pabočnuju asobu, jakaja zdymała videa kala čyhunki, zaŭvažyŭ nibyta mašynist łakamatyŭnaha depo Kalinkavičy Radźko, jaki kiravaŭ ciahnikom Kalinkavičy — Łuniniec.
Čałaviek, jak śćviardžajecca, rabiŭ videazdymku kanstrukcyj aŭtadarožnaha puciepravoda trasy M10 Homiel-Kobryn, raźmieščanaha nad cotnaj harłavinaj stancyi Kalinkavičy-Zachodnija, na adlehłaści kala 250 mietraŭ ad pasažyrskaj płatformy ŭ kirunku stancyi Łuniniec.
Infarmacyju pra hetaha čałavieka mašynist pieradaŭ dalej, i ŭ vyniku rabotnikii vajenizavanaj achovy sumiesna z supracoŭnikami Kalinkavickaha RAUS užo praz paŭhadziny pablizu ad nazvanaha puciepravoda aŭtadarohi M10 zatrymali mužčynu, jaki akazaŭsia hramadzianinam Japonii. Dalej japoniec byŭ pieradadzieny supracoŭnikam KDB.
Na momant publikacyi imia i proźvišča hetaha hramadzianina, jak i dalejšy jaho los, vyśvietlić nie ŭdałosia.
Nahadajem, što raniej, u krasaviku 2024 hoda, u Biełarusi zatrymali inšaha hramadzianina Japonii, vykładčyka Masatosi Nakanisi. Jaho abvinavačvajuć pa artykule ab ahienturnaj dziejnaści. Pavodle viersii KDB Biełarusi, ciaham šaści hadoŭ jon zdabyvaŭ źviestki pra važnyja stratehičnyja abjekty i hramadska-palityčnuju situacyju ŭ krainie dla japonskaj raźviedki.
Juraś Ziankovič raskazaŭ pra svajo vyzvaleńnie i šlach u ZŠA6
Kamientary