Źjaviłasia rasšyfroŭka pieramoŭ ekipaža rejsa Baku — Hrozny z dyśpietčaram. Usio pakazvaje na toje, što samalot padbili zienitnaj rakietaj
Telehram-kanał VČK-OHPU śćviardžaje, što jamu ŭdałosia aznajomicca z poŭnaj rasšyfroŭkaj pieramoŭ ekipaža rejsa Baku — Hrozny z dyśpietčaram u Hroznym.
Z dyjałohaŭ vynikaje, što pieršapačatkova sudna stała achviaraj hłušyłak dla BPŁA, jakija tady pracavali z-za ataki bieśpiłotnikaŭ. Jak tolki łajnier pačynaŭ źnižacca dla pasadki, u jaho pierastaŭ pracavać GPS, a dyśpietčar hublaŭ radar contact.
Piłot nie moh u takich umovach pasadzić samalot i pryniaŭ rašeńnie lacieć u Baku. Kali jon staŭ razvaročvacca dla hetaha, pobač adbyŭsia vybuch — usio śviedčyć pra toje, što ŭ bort trapili srodki SPA.
Z rasšyfrovak vynikaje, što ekipaž nieadnarazova paviedamlaŭ, što pierastali pracavać datčyki GPS. Pry tym, što bort užo čakali ŭ aeraporcie, zapalvalisia ahni pasadačnaj pałasy. Ale jak tolki samalot źnižaŭsia, to adbyvalisia niepaładki, jakija, imavierna, byli vyklikanyja hłušyłkami BPŁA.
U 07:53 i 07:55 sistemy adklučalisia amal całkam, ekipaž paviedamlaŭ, što nie moža vykarystoŭvać zanalnuju navihacyju (mietad samalotakiravańnia), i nijakija inšyja mahčymaści. Pryčym dyśpietčar taksama hublaŭ radar contact i ŭ takich umovach nie moh vieści samalot na pasadku.
Vynikaje, što samalot u aeraporcie Hroznaha nichto nie razvaročvaŭ, i ŭmovy nadvorja tut ni pry čym.
Bort sprabavali pasadzić z 07:36 (pieršaja suviaź z dyśpietčaram Hroznaha). U pracesie časta źnikała suviaź abo ŭ efiry byli pieraškody, a ekipaž sprabavaŭ zachodzić na pasadku amal uślapuju, udakładniajučy danyja až da vyšyni, na jakoj lacić samalot.
Apošniaja sproba zajści na pasadku prajšła amal u poŭnym maŭčańni. Z 08:10 da 08:11:50 u efiry maŭčali ŭsie, ale zamiest pryziamleńnia na pałasu numar 26 ekipaž paviedamiŭ «rušym na Baku».
U 08:12 ekipaž znoŭ paviedamlaje pra stratu sihnału na abodvuch datčykach GPS i prosić kaardynavać palot dyśpietčara, što jon i robić nastupnyja niekalki chvilin.
U 08:16 ekipaž paviedamlaje tryvožnuju infarmacyju: «U nas nie pracuje kiravańnie, udar ptušak u kabinie. Udar ptušak u kabinie (nierazborliva)». Potym niekalki razoŭ paŭtaraje adno i toje ž, pry hetym nazyvajučy ptušak u množnym liku.
Jakraz u hety čas pobač z sudnam adbyŭsia vybuch, i ŭdary paražalnymi elemientami ekipaž moh pryniać za sutyknieńnie z čaradoj ptušak.
Dalej dyśpietčar pytajecca, ci patrebnaja niejkaja dapamoha, a ekipaž pierš za ŭsio zapytvaje danyja pra nadvorje ŭ aeraporcie ŭ Minvodach i potym paćviardžaje, što dapamoha patrebna. Śledam tryvoha prasočvajecca ŭžo ŭ dyśpietčara — jon niekalki razoŭ u efiry paŭtaraje: «u 16-ju chvilinu», jak byccam jon kaža adnačasova ź niekim inšym i ź im supastaŭlaje čas paviedamleńnia ab sutyknieńni z ptuškami ź niejkimi inšymi padziejami.
Toj samy ŭdar, pavodle danych krynicy VČK-OHPU, adbyŭsia nad Naurskim rajonam Čačni, u hetaj miascovaści raźmieščanyja adrazu niekalki vajskovych čaściej, u tym liku i sa srodkami SPA.
U 08:18 ekipaž paviedamiŭ dyśpietčaru, što stračvaje kiravańnie samalotam.
Dalej ekipaž zapytaŭ danyja pa aeraporcie ŭ Machačkale, i nieadnarazova paviedamlaŭ pra toje, što pierastała pracavać jašče i «hidraŭlika».
Kamientary