Andrej Kašpierski zdymaje film žachaŭ «Sud miortvych» pa matyvach biełaruskich sudoŭ
Režysior Andrej Kašpierski, adzin sa stvaralnikaŭ sieryjału «Pracesy», źniaŭ karotkamietražny chorar «Judgment of the Dead» («Sud miortvych») z Zojaj Biełachvościk u hałoŭnaj roli. Ciapier biarecca za poŭny mietr pad toj ža nazvaj, piša «Biełsat».
Adzin sa stvaralnikaŭ sieryjału «Pracesy» i suaŭtar prajektu «ČynČynČenał» režysior Andrej Kašpierski źniaŭ karotkamietražny chorar «Judgment of the Dead» («Sud miortvych») z Zojaj Biełachvościk u hałoŭnaj roli. U razmovie z «Biełsatam» jon raspavioŭ, što karotki mietr — tolki pačatak šlachu: čakajem poŭnamietražnaha filmu žachu pad toj ža nazvaj.
— Usio prosta: hety film pra realny zakon, pryniaty ŭ Biełarusi ŭ 2023 hodzie, pavodle jakoha možna ciapier sudzić miortvych. U našaj karotkamietražcy my hety zakon trochu «dakrucili». Hałoŭnaja hierainia — sudździa Alaksandra Drahun, nie prosta sudzić miortvych, a sudzić ich, kab adabrać ichnuju nieruchomaść. Nu i ŭ niejki momant pamierłyja paŭstajuć, kab pieraśledavać sudździu Alaksandru… Napeŭna, tolki heta i mahu raspavieści, kab nie spojleryć, — kaža Kašpierski.
Jon raspaviadaje, što z suaŭtaram Michaiłam Zujom jany zrabili užo pieršy draft i zaraz pracujem nad druhim.
— Pierapracoŭvajem strukturu, dadajom novych piersanažaŭ. Heta praces, jaki nie spynicca až da kanca zdymačnaha pieryjadu, da kanca mantažu. Prydumvajem dadatkovyja repliki, štości pieraahučvajem, dadajom citry i hetak dalej. Scenar dapiłoŭvajecca vielmi doŭha. Ale hetak jano adbyvajecca, jak praviła, va ŭsich filmach suśvietnaj industryi, — raspaviadaje Kašpierski.
Hałoŭnaja hierainia 15-chvilinnaj karotkamietražki — sudździa Alaksandra Dźmitryjeŭna Drahun u vykanańni Zoi Biełachvościk. A voś hierainiaj poŭnamietražnaha filmu płanujuć zrabić jaje dačku — taksama sudździu Dzijanu Drahun.
— Sudziejstva — ich siamiejnaja sprava. I my chočam praz historyju maci pierajści da historyi dački i da ich uzajemaadnosinaŭ. I ja vielmi i vielmi spadziajusia, što Dzijanu syhraje dačka Zoi Biełachvościk aktorka Valancina Harcujeva. Prynamsi my ŭžo raspaviali joj, što pišam scenar pad jaje i dla jaje. Ci ŭdasca jaje załučyć — pytańnie, bo ŭsiakaje byvaje, i nie treba zabyvacca, u jakich abstavinach my žyviom. Ale majem vialikaje žadańnie, kab mienavita Valancina Harcujeva ŭziała ŭdzieł u našym prajekcie, — dadaje Kašpierski.
Kamientary