«Siarod sajuźnikaŭ Rasii Łukašenka navat nie na trecim miescy ŭ śpisie. Dzieści ŭ rajonie piataha»
Jakich źmien čakać u ekanamičnaj padtrymcy Rasii da Biełarusi — tłumačyć ekśpiert Arkadź Mošes.
Dyrektar daśledčych prahram Uschodniaha susiedstva i Rasii Finskaha instytuta mižnarodnych adnosin, adzin z aŭtaraŭ knihi «Palityka Rasii pa Biełarusi paśla 2020 hoda» Arkadź Mošes u efiry «Jeŭraradyjo» raskazaŭ, što bačyć vialikuju vierahodnaść taho, što ekanamičnaja padtrymka Biełarusi z boku Rasii ŭ bližejšaj pierśpiektyvie moža źmianicca.
Całkam hetyja hrošy nie źniknuć, adznačaje analityk, ale z 2022 hoda, kali Łukašenka pazicyjanavaŭ siabie ŭ jakaści hałoŭnaha sajuźnika i daŭ terytoryju krainy i jaje pavietranuju prastoru dla ataki na Ukrainu, šmat što źmianiłasia.
«Siońnia toje, što Biełaruś moža dać Maskvie, nie idzie ni ŭ jakoje paraŭnańnie ni tolki z tym, što moža dać Kitaj — dypłamatyčnaja i ekanamičnaja padtrymka, ale i z tym, što moža dać Paŭnočnaja Kareja, jakaja nie prosta ešałonami pasyłała snarady, (…) a pasłała sałdat. I heta važna.
Łukašenka ŭ hetym śpisie nie tolki nie na pieršym miescy, jon užo, chiba što, nie na trecim. Dzieści ŭ rajonie piataha. I ŭ hetaj situacyi raniej ci paźniej, a jašče z ulikam taho, što kali jamu ničoha nie płacić, jon usio roŭna nie vyhanić rasijskija vojski ŭ tyja momanty, kali im spatrebicca kantrol nad terytoryjaj i vykarystańnie terytoryi Biełarusi i jaje vajenna-pavietranaj prastory. Heta pasłuha ŭžo akazanaja. (…) Za jaje ŭžo nie treba ničoha płacić».
Inšy faktar — sama Rasija nie vielmi ŭjaŭlaje, jakim budzie jaje ekanamičny stan.
«Ja razumieju, što znajści niekalki miljardaŭ dalaraŭ dla Biełarusi było b nie takoj składanaj zadačaj. Ale ci zachoča Pucin heta rabić?» — davodzić ekśpiert.
«My bačym, što ŭ Rasii (…) ničoha nie abvaliłasia. I nie mahło abvalicca, tamu što heta nie saviecki režym. Heta rynkavaja ekanomika. Svojeasablivaja, ale pracujučaja. Ale hrošaj bolš u kaźnie nie stanovicca. Deficyt jość. Jaho pačynajuć staranna chavać. Apłačvać vajnu stanovicca ŭsio daražej».
Praz paŭhoda rasijskaja ekanamičnaja situacyja moža źmianicca, miarkuje Mošes.
«Kali jana pačnie mianiacca ŭsurjoz, to, adpaviedna, buduć skaročany ŭsie dapamohi, jakija płaciacca Minsku», — ličyć jon.
Babaryka pra siabie ŭ 2020-m: Heta nie naiŭnaść. Nie dumaju, što takoha kryvažernaha scenara niechta čakaŭ79
Kamientary
Ekśpiert otvieta nie dajot, on, sčitajet, čto skotnyj dvor łukašienko prodołžit uśpiešnoje suŝiestvovanije i pośle razdieła Ukrainy......