Ministr abarony ZŠA Pit Chiehsiet zahadaŭ prypynić kibierataki suprać Rasii, paviedamlajuć adrazu niekalki amierykanskich ŚMI sa spasyłkaj na krynicy. Detali zahadu nieviadomyja, ale žurnalisty źviazvajuć jaho ź ciapierašnimi pieramovami pamiž Rasijaj i ZŠA i imknieńniem Donalda Trampa dabicca pieramirja ŭ rasijska-ŭkrainskaj vajnie, piša Bi-bi-si.
Pra toje, što Chiehsiet zahadaŭ prypynić kibierataki suprać Rasii, napisała hazieta New York Times, jakaja spasłałasia na try nienazvanyja krynicy, znajomyja ź situacyjaj.
Pavodle vydańnia, novyja instrukcyi byli vydadzienyja Kibierkamandavańniu ZŠA jašče da taho, jak prezident krainy Donald Tramp na vačach u žurnalistaŭ pasvaryŭsia z ukrainskim lidaram Uładzimiram Zialenskim.
Upieršyniu pra zahad raspaviało vydańnie The Record. U jaho publikacyi było skazana, što kiraŭnik Pientahona vydaŭ adpaviednyja instrukcyi načalniku Kibierkamandavańnia ZŠA hienierału Cimaty Cho. Toj, u svaju čarhu, pieradaŭ ich apieracyjnamu dyrektaru arhanizacyi, hienierał-majoru korpusa marskoj piachoty Rajanu Cherytedžu, jaki pakidaje pasadu.
Detali zahadu Chiehsieta nieviadomyja.
Ale Washington Post sa spasyłkaj na adnaho dziejučaha i adnaho byłoha čynoŭnika piša, što kibierataki prypynienyja na čas pieramoŭ pamiž ZŠA i Rasijaj. Kamandavańniu skazali, što novyja instrukcyi buduć dziejničać «u najbližejšaj budučyni», zajaŭlajuć krynicy The Record.
Krynicy The Record taksama raspaviali, što Kibierkamandavańnie pačało składać «acenku ryzykaŭ» dla Chiehsieta. Takoha rodu spravazdača paćviardžaje atrymańnie zahadu, pieraličvaje biahučyja misii, prypynienyja ŭ vyniku rašeńnia, i padrabiazna apisvaje patencyjnyja pahrozy, jakija ŭsio jašče sychodziać ad Rasii.
Pientahon admoviŭsia ad kamientaryjaŭ. «Dla ministra abarony Chiehsieta niama ničoha bolš važnaha, čym biaśpieka bajcoŭ va ŭsich apieracyjach, u tym liku ŭ apieracyjach u kibierprastory», — skazali ŭ viedamstvie.
Ciapier čytajuć
Što zdaryłasia z vykładčykam BNTU Michaiłam Ščukinym, jaki pamior pry zatrymańni. Viersija milicyi14
Kamientary
po poniatijam hopnikov, dalšie budiet akt publičnoho unižienija.