Što źmienicca dla markietpłejsaŭ i kali ŭviaduć apłatu tolki bieznajaŭnymi? Raskazali ŭ ministerstvie

Ciapier u zakanadaŭstvie jość ahulnaja norma ab tym, što internet-placoŭka pavinna sadziejničać spažyŭcu ŭ abaronie jaho pravoŭ. MARH choča kankretyzavać abaviazki markietpłejsaŭ.

— Płanujem, što ŭ zakonie ab abaronie pravoŭ spažyŭca źjaviacca normy, jakija buduć kazać pra toje, što kali tavar niajakasny, to internet-placoŭka pavinna jaho pryniać i pieradać pradaŭcu i zabiaśpiečyć viartańnie hrašovych srodkaŭ, — skazała Ina Haŭrylčyk.

Kali krama nie śpiašajecca viartać pakupniku hrošy, to heta robić markietpłejs. A potym jon vyrašaje pytańnie z kramaj, kab taja viarnuła jamu vypłačanyja hrošy.

Pradstaŭnica MARH patłumačyła, što ŭ markietpłejsaŭ jość instrumienty ŭździejańnia na kramy, naprykład, mahčymaść adklučyć pradaŭca ad placoŭki, kali jon nie vykonvaje patrabavańni zakanadaŭstva ab abaronie pravoŭ spažyŭcoŭ.

Ci dazvolać apłatu tolki bieznajaŭnymi?

Jašče adno z novaŭviadzieńniaŭ dla internet-handlu, jakoje prapanuje MARH, — dazvolić apłatu tolki bieznajaŭnym sposabam. Ciapier pakupnik moža vybirać, jak raźličvacca — najaŭnymi abo kartkaj.

Pakul siarod dziaržorhanaŭ, jakija pavinny ŭzhadnić źmieny ŭ zakanadaŭstva, niama adzinaha mierkavańnia.

— Uličvajučy transhraničnaść internet-handlu, ličbavizacyju, mnohija internet-kramy hatovyja pierajści tolki na bieznajaŭny raźlik. U hetaj častcy nas padtrymlivaje i Nacyjanalny bank, i Ministerstva pa padatkach i zborach, tamu što heta prazrystaść płaciažoŭ.

Pahladzim, vystaić hetaja norma pry pracedurach ŭzhadnieńnia ci nie. Sprečki pakul iduć, budziem sačyć, za što prahałasuje bolšaść uzhadniajučych instancyj.

Što jašče čakać internet-kramam

Z 11 lipienia ŭ internet-placovak źjaviacca novyja abaviazacielstvy: u pakupnikoŭ pavinna być mahčymaść zapoŭnić elektronnuju formu zamovy da taho, jak jon zavieršyć jaho afarmleńnie.

Akramia hetaha, u pakupnika pavinna być mahčymaść padać zvarot ab parušeńni pravoŭ spažyŭcoŭ u elektronnaj formie.

— Siońnia subjekty haspadarańnia nie abaviazanyja adkazvać na elektronny zvarot, kali tolki jany sami nie pryniali dla siabie takuju pastanovu. Dla dziaržaŭnych orhanaŭ taki abaviazak jość, a voś dla inšych arhanizacyj niama.

Jak patłumačyła Ina Haŭrylčyk, časam ofis internet-kramy znachodzicca vielmi daloka ad spažyŭca, tudy niazručna dabiracca, tamu chočuć praduhledzieć, što internet-kramy pavinny buduć adkazvać na elektronnyja zvaroty.

Uładalnik internet-placoŭki taksama budzie abaviazany:

• pradastaŭlać pakupniku paćviardžeńnie zaklučeńnia dahavora;
• prymać miery pa vykanańni pradaŭcami patrabavańniaŭ zakanadaŭstva ab handli i abaronie pravoŭ spažyŭcoŭ, abaronie infarmacyi, u tym liku piersanalnych danych;
• spyniać prodaž tavaraŭ, abmiežavanych da abarotu;
• akazvać sadziejničańnie spažyŭcam u abaronie.

Novyja patrabavańni da punktaŭ vydačy zakazaŭ

Pradstaŭnica MARH źviarnuła ŭvahu, što punkty vydačy zakazaŭ nie źjaŭlajucca handlovymi abjektami, tamu na ich nie raspaŭsiudžvajucca takija patrabavańni, jak da kram.

Pavodle jaje słoŭ, hety siehmient «vypaŭ z rehulavańnia», tamu ŭvodziacca patrabavańni, jakaja infarmacyja pavinna być u punktach vydačy zakazaŭ.

Heta ŭ tym liku poŭnaje najmieńnie i miescaznachodžańnie ŭładalnika PVZ, numary kantaktnych telefonaŭ i adras elektronnaj pošty ŭładalnika, režym pracy, nazva internet-resursaŭ i pradaŭca, čyje tavary jon vydaje. Punkty vydačy zakazaŭ taksama abaviazany buduć akazvać sadziejničańnie pakupnikam u abaronie pravoŭ spažyŭcoŭ.

Naviazać płatnyja padpiski stanie składaniej

Z normaŭ, jakija zapracujuć užo zusim chutka, pradstaŭnica MARH nahadała ab źmienie praviłaŭ akazańnia pasłuh elektrasuviazi.

Z 1 krasavika stanie składaniej vypadkova aformić płatnyja padpiski, jakija niaredka stanavilisia siurpryzam dla abanientaŭ mabilnych apierataraŭ. Pra isnavańnie padpiski abanienty niaredka daviedvalisia paśla śpisańnia hrošaj.

Pa słovach Iny Haŭrylčyk, MARH adpracoŭvaje zvaroty ad abanientaŭ na hetuju temu, «pavoli hrošy viartajucca», ale prablemu treba było vyrašać sistemna, tamu ŭ zakanadaŭstva ŭnieśli źmieny.

Z 1 krasavika zhoda abanienta na padpisku pavinna być dakładna zafiksavana — naprykład, treba prastavić adznaku ab zhodzie ŭ asabistym kabiniecie, nakiravać USSD-zapyt abo SMS, padać zajavu ŭ servisnym centry apieratara abo skarystacca elektronnym ličbavym podpisam.

— Voś tady čałaviek budzie razumieć, na što jon padpisvajecca. Tamu što apieratary mała taho, što dapuskali heta parušeńnie, pajšli jašče dalej i pačali prapanoŭvać płatnuju pasłuhu pa kantroli za takimi padpiskami. Z našaj pazicyi heta naviazvańnie dadatkovych płatnych pasłuh plus jašče da taho parušeńnia, jakoje ŭžo było, a naviazvańnie ŭ nas nie dapuskajecca. Tamu rasceńvaju heta jak vielmi dobruju navinu dla spažyŭcoŭ, — reziumavała pradstaŭnica MARH.

• 2
• 0
• 0
• 1
• 0
• 0
• 0
• 0